Vila “Golden” në Xhafzotaj të Durrësit, aty ku përflitet se ka ndodhur një krim alla “Khashoggy”, ka qenë e ekzekutuara e parë e aksionit anti-krim, të pagëzuar si “Anti-KÇK”, ose zyrtarisht si Operacioni Forca e Ligjit, i cili startoi këtë të hënë, duke patur në shënjestër asete të dyshuara që vijnë nga krimi e droga.
“Golden”, një resort nën pronësi të Altin Hajrit tashmë në kërkim, i kalon shtetit sipas një njoftimi zyrtar.
“Në zbatim të ligjit special për masat pasurore ndaj individëve të dënuar apo akuzuar, operacioni Forca e Ligjit ka vendosur sekuestron e parë mbi kompleksin e shërbimeve Vila Golden dhe një karburant për tregtimin e hidrokarbureve në pronësi të shtetasit Altin Hajri.
Ai është dënuar me burg në Itali për veprën penale trafikim i lëndëve narkotike kryer në bashkëpunim. Ai është shpallur në kërkim nga Policia e Shtetit në funksion të hetimitpër rrëmbimin e Jan Prengës.
Sekuestrimi i këtij objekti dhe i të gjitha pronave të Altin Hajrit bëhet në bazë të elementit të urgjencës të parashijuar në ligj.
Objekti kalon në administrim të Agjencisë së Administrimitë Aseteve. Dosja pasurore e tij i kalon SPAK dhe jo më shumë se 15 ditë ia dërgon Gjykatës Speciale e cila ka 15 ditë kohë për të konfirmuar masën e sekuestrimit duke i hapur rrugë për konfiskimin përfundimtar të pasurisë së Altin Hajrit”, thuhet në deklaratë.
Deklarata vijon duke thënë se “pas sekuestrimit, Ministria e Brendshme vendos për shfrytëzimin ose shembjen e këtij objekti, si dhe do të marrë në zotërimin e saj dhe do të përdorë për interesin publik paratë, pasuritë dhe tokat e këtij shtetasi”.
Nga ana tjetër, opozita e kundërshton këtë praktikë të bazuar mbi një akt normativ në bazë të të cilit vepron policia me paketën “Anti-KÇK”, duke e konsideruar atë edhe si anti-kushtetues. /tesheshi.com/
