Policia e Kosovës dhe forca speciale të saj kanë mësyrë mëngjesin e kësaj të marte në Veri, në një aksion gjigand për goditjen e elementëve kriminalë, sidomos të atyre që bëjnë ligjin aty me afera kontrabande.
Në një moment të caktuar, ka qenë kryeminsitri Haradinaj ai që ka bërë dhe zëdhënësin.
“Me urdhër të Prokurorit, në gjithë Kosovën aktualisht është duke ndodhur një operacion policor, i drejtuar ndaj individëve të përfshirë në kontrabandë, krim të organizuar dhe vepra të tjera kriminale.
Disa prej personave të përfshirë në këto vepra janë zyrtarë doganorë, policë por edhe qytetarë të rëndomtë. Operacioni u zhvillua me sukses edhe në Komunat Veriore të Kosovës.
Si kryeministër i vendit, konfirmoj se bëhet fjalë për zbatimin të ligjit dhe asgjë tjetër. Ftoj serbët e Veriut ta ruajnë qetësinë dhe ta respektojnë ligjin!”, shkruan Haradinaj.
Ndërsa në Beograd është lexuar ndryshe. Ka qenë vetë presidenti Vuçiç që ka reaguar duke se “Serbia nuk do lejojë spastrim etnik”, njëherësh duke urdhëruar ushtrinë që të jetë në gjendje gatishmërie.
Reagimet nga ana e serbëve të Veriut kanë qenë të ashpra, deri dhe me zjarr, ku si pasojë ka mbetur i plagosur një polic i Kosovës. E nga ana tjetër është arrestuar komandanti serb i postës policore të Zubin Potokut.
Mësohet gjithashtu se presidenti Thaçi ka mbledhur urgjent strukturat e sigurisë për t’ju përgjigjur situatës së tensionuar. /tesheshi.com/
