Policia e Tiranës vijon operacionin për kapjen e personave të tjerë, anëtarë të bandës së grabitësve të bankave, ku përfshihet pra dhe ajo e pak ditëve më parë në aksin Qafë Kashar – Rinas, ku u rrëmbyen 3.2 milion dollarë.
Burime nga policia bëjnë me dije se operacioni, i koderuar nën emrin “Patriot” ka vijuar gjatë gjithë natës në Tiranë dhe në disa qarqe.
Arrestime të tjera veç katër të parëve ende nuk ka patur, por policia thotë se gjatë një kontrolli në Vlorë u gjetën në një ambient të jashtëm të groposura dy tenxhere me presion të mbushura me kartëmonedha paund, dollarë amerikanë, australianë, kanadezë si dhe euro.
Ndërsa në Vorë, tek servisi i familjes Murataj u gjet një kasafortë me një sasi eurosh e dollarë. Kontrollet kanë vijuar në disa banesa, hotele e lokale në Prezë, Vorë, Farkë, në Vlorë, Lushnje etj. /tesheshi.com/
