Një sasi heroine, fishekë luftarakë dhe armë të ftohta janë sekuestruar nga policia e Durrësit në një operacion antidrogë të koduar “Mbrëmja”.
Lënda narkotike u gjet në banesën e shtetasit të identifikuar me inicialet B.K, por ky i fundit ka arritur t’i shpëtojë policisë, e cila e ka shpallur në kërkim.
Sipas informacioneve zyrtare, specialistët për Hetimin e Narkotikëve në Drejtorinë Vendore të Policisë Durrës në bashkëpunim me Specialistët për Krimet në Komisariatin e Policisë Shijak, në bazë të informacioneve të siguruara në rrugë operative se një shtetas dispononte një sasi lënde narkotike të llojit Heroinë, kanë organizuar dhe zhvilluar operacionin antidrogë të koduar “Mbrëmja”.
“Gjatë kontrollit të ushtruar në banesën e shtetasit B.K. në Shijak u gjetën dhe u sekuestruan në cilësinë e provave materiale:
• 447.5 gramë lëndë narkotike e dyshuar e llojit Heroinë;
• një peshore mekanike dhe një peshore elektronike;
• një thikë me gjatësi 27 cm dhe
• 124 copë fishekë model 56.
Shtetasi B.K, pronari i banesës, nuk ndodhej në të në momentin e kontrollit dhe është shpallur në kërkim ku vijon puna për kapjen e tij.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale ” Prodhimi dhe shitja e narkotikëve”, “Prodhimi dhe mbajtja pa leje e armëve luftarake dhe e municionit” dhe”Prodhimi dhe mbajtja pa leje e armëve të ftohta” parashikuar në nenet 283/1, 278/4 dhe 279 të Kodit Penal”, thuhet në njoftimin zyrtar të policisë. /tesheshi.com/
