Forcat qeveritare irakiane kanë ndërmarrë ofensivën për të çliruar pjesën perëndimore të qytetit të Mosulit nga militantët e të ashtuquajturit ISIS. Sipër fshatrave është parë të ngrihet tym, ndërsa qindra mjete ushtarake, të mbështetura nga fuqia ajrore, marshuan përmes shkretëtirës drejt pozicioneve të luftimit.
Fushata e sulmit u njoftua edhe zyrtarisht nga ana e kryeministrit të Irakut, Haider al-Abadi.
Forcat qeveritare rimorrën pjesën lindore të qytetit, në bastionin e fundit të madh të ISIS në Irak, muajin e kaluar. Por pjesa perëndimore, me rrugët e saj të ngushta e të kryqëzuara, mund të dëshmohet të jetë një sfidë më e madhe.
Kombet e Bashkuara artikuluan shqetësimin për civilët e mbërthyer në qytet, pasi ka raportime se ata mund të shkojnë deri në 650 mijë persona. Fletushkat paralajmëruese për banorët për një sulm të mundshëm u lëshuan nga ajri në qytet.
“Njoftojmë nisjen e një faze të re në operacionin e Mosulit”, deklaroi Abadi në një fjalim televiziv. Sipas tij, forcat qeveritare do të nisin çlirimin e qytetarëve nga terrori i ISIS.
Forcat irakiane tashmë kanë rrethuar pjesën perëndimore të Mosulit, ndërsa koalicioni që drejtohet nga amerikanët ka ndërmarrë sulme ajrore. Marrja e qytetit, thonë korrespondentët, nuk është vetëm objektiv ushtarak, por edhe përpjekje e qeverisë për të forcuar kontrollin në vend. /tesheshi.com/
