Policitë e 3 shteteve, Italisë, Greqisë dhe Shqipërisë u angazhuan në një operacion për bllokimin e një mjeti lundrues, ku gjetën dhe sekuestruan në afërsi të Otrantos 712 kg lëndë narkotike Cannabis Sativa. Në prangat e policisë kanë rënë tre skafistë.
Njoftimi për mjetin lundrues është dhënë nga policia greke, e cila njoftoi kolegët shqiptarë për një gomone që dyshohet se po trafikonte lëndë narkotike nga Greqia për në Itali.
Ndërkohë Policia e Shtetit ka aktivizuar në det dhe në terren të gjitha shërbimet e Policisë Kufitare, Delta Force, si dhe ka njoftuar QNOD dhe Rojen Bregdetare e cila ka nxjerrë menjëherë në det shërbime në ndihmë të Policisë së Shtetit.
Guardia di Finanza e Puglias ka bërë të mundur që në orët e para të mëngjesit në afërsi të Otrantos të ndalojë mjetin lundrues tip gomone me tre shtetas shqiptarë në bord konkretisht: L.B, 38 vjec, H.M, 23 vjeç dhe Xh.H 24 vjeç.
Guardia di Finanza e Puglias ka gjetur e sekuestruar në bordin e gomones 712 kg lëndë narkotike Cannabis Sativa.
Po vijon shkëmbimi intensiv i informacionit mes tre policive për zbardhjen e plotë të këtij rasti, si dhe për identifikimin dhe kapjen e personave të tjerë të përfshirë në këtë trafik.
Nga veprimet paraprake dyshohet se gomonen e ka çuar në Greqi një shtetas Italian me qëllim trafiku të lëndëve narkotike nga Greqia për Itali me skafistë nga Shqipëria.
Detaje të tjera nuk mund të jepen për shkak të sekretit hetimor. /tesheshi.com/
