Në një aksion të madh ndërkombëtar kundër “pastrimit të parave”, i cili u krye në 25 vende nën koordinimin e Organizatës Evropiane të Policisë (Europol), u ndaluan 2469 persona.
Gjatë fazës operacionale të kryer nga mesi i shtatorit deri në fund të nëntorit, janë identifikuar 8755 “korierë” për transferimin e parave, bashkë me 222 “rekrutë”, raporton Anatolia.
Europol deklaroi se është regjistruar se 17.5 milionë euro “para të zeza” janë sekuestruar nga 4089 transaksione të dyshimta, të cilat janë mbështetur nga rreth 1800 banka dhe institucione të ndryshme.
Operacioni u mbështet nga Federata Evropiane e Bankave (EBF), Agjencia për Bashkëpunim Gjyqësor të Bashkimit Evropian (Eurojust) dhe Interpol, dhe përfshinte forcat e sigurisë të vendeve anëtare të BE-së dhe njësitë e sigurisë së Britanisë së Madhe, SHBA-së, Singaporit, Hong Kong-ut dhe Moldavisë.
Europoli, i cili dëshiron të parandalojë përdorimin e njerëzve të pafajshëm si mjet për “pastrimin e parave”, nga sot do të përpiqet të ndërgjegjësojë në rrjetet sociale me hashtagun #DontBeaMule (Mos u bëj korrier).
Europol ka kryer më parë shtatë operacione nën emrin “Aksioni evropian kundër korrierëve financiarë” në luftën kundër krimit të “pastrimit të parave”. /tesheshi.com/
