Presidenti serb Alaksandër Vuçiç tha se i ka ardhur në majë të hundës duke tentuar të shpjegojë se përse vendet e tjera nuk marrin pjesë në “Open Balkan”.
“Më ka ardhur në majë të hundës që duhet të japim justifikime për hiçgjë. A thua se kemi bërë ndonjë gjë të gabuar. Ne nuk kemi më arsye pse të kërkojmë ndjesë atyre që nuk duan të bëhen pjesë. Do jetë shumë e vështirë për shumë qeveri në rajon t’u shpjegojnë qytetarëve të tyre pse nuk janë pjesë e kësaj iniciative”, tha ai në tryezën e radhës në Tiranë, me Ramën dhe Zaevin.
Vuçiç qe më konkret në shpalosjen e pozitivitetit që sipas tij ofron projekti i “Ballkanit të Hapur”.
“Kjo iniciativë është shumë më e madhe se në të tre. Po të hapim kufijtë, objektivi më i rëndësishëm është të lidhim qytetarët tanë me njëri tjetrin. Që njerëzit të kenë mundësi të ndërveprojnë me njëri tjetrin.
Mbrëmë kam biseduar me disa përfaqësues të bizneseve shqiptare dhe pashë një dëshirë të madhe për të bërë biznes në Shqipëri dhe Maqedoninë e Veriut.
Unë njoh biznesmenë serbë që do vinin për të investuar këtu. Besoj fort se do ketë edhe më shumë turistë. Lejet e punës janë shumë të rëndësishme. Fabrika që ne e kemi edhe në Maqedoninë e Veriut kishte nevojë për inxhinierë që të bënin disa trajnime me punëtorët tanë atje. Ishte shumë e vështirë të nxirreshin lejet e punës. Tani ndoshta nuk do na duhet të bëjmë asgjë pasi ata janë thjesht të mirëpritur.
Do ta zgjerojmë tregun e punës duke tërhequr kështu më shumë biznese. Do ofrojmë një krah pune dhe njerëzit tanë do lëvizin nga vendi në vend aty ku janë punët”, shpjegoi Vuçiç. /tesheshi.com/
