Në prag të takimit të radhës në Tiranë në kuadër të “Open Balkan”, ministrja e Bujqësisë Frida Krifca njoftoi pas mbledhjes së qeverisë se në kuadër të kësaj nisme është firmosur një marrëveshje bashkëpunimi në fushën e veterinarisë dhe sigurisë ushqimore, duke njohur certifikatat dhe laboratorët e autorizuar.
Kjo, sipas saj, ka qenë një nga shqetësimet e biznesit dhe eviton ndalesat në pikat e inspektimit kufitar.
“Marrëveshje bashkëpunimi në fushën e veterinarisë për sigurinë ushqimore dhe fitosanitare në kuadër të Ballkanit të Hapur mes vendeve të Ballkanit.
Përfitimet për Shqipërinë janë sepse për herë të parë hapet eksporti për produktet blegtorale, përfshirë kafshët e gjalla në bazë të reciprocitetit, duke respektuar mbrojtjen e territoreve nga sëmundjet e transmetueshme në bimë e kafshë është arritje se është adresuar prej kohësh nga operatorët e biznesit.
Njihen për herë të parë certifikatat e veterinarisë dhe sigurisë ushqimore e fitosanitare dhe laboratorët e akredituar dhe autorizuar duke hequr kosto të shtuar, duke adresuar një shqetësim të biznesit dhe duke evituar ndalesat në pikat e inspektimit kufitar duke kryer kontroll në doganën më të afërt”, sqaroi ajo.
Ajo shtoi më tej se marrëveshja nënkupton shkëmbimin e informacioneve në kohë reale për mbarëvajtjen e tregtisë rajonale. “Qëllimi është rritje produktivitetit dhe konkurrueshmërisë së fermerëve shqiptarë. Kemi punuar shumë fort për rritjen e standardeve se tregu kërkon rritje të cilësisë”. /tesheshi.com/
