Në një intervistë për VOA-n, kryeministri Albin Kurti shpjegoi dhe njëherë se përse nuk e pranon projektin “Ballkan i Hapur”.
“Por, nëse e quajmë Ballkan dhe Ballkan i Hapur, besoj se testi i së vërtetës është hapja e Serbisë ndaj Kosovës. Ata nuk i pranojë as dokumentet tona të udhëtimit, kartat e identitetit, nuk i pranojnë as vulat, certifikatat dhe diplomat tona, prandaj me një Serbi të mbyllur për Kosovën, nuk e di se si mund te kemi Ballkan të Hapur.
Ndërkaq, në një rrafsh edhe më individual do të thosha, besoj që kështu ndjehen shumica dërmuese e qytetarëve të Republikës sonë. As si përcaktim politik as si ndjeshmëri kulturore, unë nuk u përkas atyre që besojnë në vetëmjaftueshmërinë e Ballkanit.
Unë jam i bindur që Kosova dhe shqiptarët në përgjithësi e kanë vendin e tyre në NATO dhe BE”, arsyetoi ai.
Ndërsa sa i përkt faktin të pretenduar nga nënshkruesit e projektit, treshja Rama – Vuçiç – Zaev, se “Open Balkan” ka mbështetje ndërkombëtare, Kurti kishte një shpjegim origjinal për këtë pretendim.
“Unë në jam i bindur që mbështetja që vjen nga Perëndim për Ballkanin e Hapur, është më shumë nga motivi që të mos i dilet kundër idesë, sesa të përkrahet projekti si i tillë.
Pra, nuk duan ta kundërshtojnë idenë, por nuk është se aktivisht po marrin pjesë pastaj në projektin e tillë. Dhe të mos harrojmë që tek këto tri shtete që po marrin pjesë në iniciativën e Ballkanit të Hapur, vetëm njëri shtet e ka pajtimin edhe të presidentit edhe të kryeministrit: Serbia”.
Megjithatë, ai nuk e dramatizoi faktin se ka padakortësi për këtë çështje me kryeministrin Rama. Përkundrazi, raportet Tiranë – Prishtinë, i quajti të shkëlqyera.
“Marrëdhëniet midis Prishtinës dhe Tiranës janë ndër më të mirat në Kosovën e pasluftës.
Ne kemi mospajtime edhe në Kuvendin e Republikës së Kosovës, edhe brenda partive politike nganjëherë kemi mospajtime edhe brenda kabineteve qeveritare e lëre më midis dy kryeministrave.
Por, me vet faktin që përmendet kaq shumë ky mospajtim, besoj që kjo tregon se në fakt, ka fare pak ose aspak mospajtime të tilla”, tha Kurti.
Sa i përket Dialogut të ngecur me Beogradin, ai ishte optismist për fundin e tij brenda mandatit.
“Unë besoj që dialogu, bisedimet dhe marrëveshja ndërmjet Kosovës dhe Serbisë, do të duhej të përfundonte brenda të mandatit të qeverisë së Republikës së Kosovës e që koincidon, që përputhet edhe me mandatin e presidentit amerikan, Joe Biden dhe atë të Komisionit aktual Evropian të udhëhequr nga zonja Ursula von der Leyen dhe me zëvendësin e saj, përfaqësuesin e lartë për politikën e Jashtme dhe atë të sigurisë, zotin Josep Borrell”, tha Albin Kurti për VOA-n. /tesheshi.com/
