Edhe pse e majtë, deputetja Olta Xhaçka ka marrë një shembull ekstra të djathtë për të përligjur një lloj revolte të njerëzve karshi reformave të pretenduara nga qeveria: Margaret Theçeri, ish-kryeministren britanike të viteve `80. E ftuar nga gazetari Enkel Demi në ‘Shih Programin’, Xhaçka u doli garant shqiptarëve se çfarë po heqin sot do ia shohin me patjetër hajrin nesër….
Ka një lloj depresioni shoqëror prej reformave dhe masave të ndërmarra nga qeveria apo jo?
Po, ndoshta, po. Por duhet theksuar se reformat përgjithësisht i tregojnë sukseset e tyre apo objektivat e mbërritura pas njëfarë kohe, jo menjëherë. Reformat janë pak a shumë siç thoshte dikur Margaret Theçer: “Nëse pacienti është shumë i sëmurë edhe terapia është më e vështirë”. E di edhe që mund të jetë e dhimbshme, por është një përpjekje për të vënë shtetin në shinat e ligjshmërisë, për të krijuar nje raport me të drejtë mes shtetit dhe qytetarëve, për të patur më shumë shërbime në të ardhmen, më shumë shkolla, spitale. Dhimbjet sot mund të jenë të forta, por këto do të kalojnë dhe e rëndësishme është ajo çfarë do të mbetet.
Margaret Theçer, një ultrakonservatore, nuk besoj se është frymëzim për të majtën…
Dakord, por vlen postulati gjithsesi…
Margaret Theçer, kur filloi të bënte reformat në vitet ‘80 ka hequr “picirin” me protesta deri edhe të dhunshme, luftë me sindikata, pra nuk e ka patur aspak të lehtë…
Padyshim, reformat dhembin pa dallim ideologjie.
A i kishit menduar këto lloj reformash kur erdhët në pushtet, sepse dukej si një revolucion i kadifejtë ardhja juaj…
Nuk besoj se kemi vizatuar nje situatë të kadifejtë, ne kemi vizatuar endrrën tonë, atë që do të donim që Shqipëria të ishte, kemi vizatuar objektivat afatshkurtër dhe afatgjatë programor, kemi vizatuar çfarë do bënim në qeverisje së bashku me aleatin tonë. Nuk e dinim sesa e rëndë ishte situata. Jam e bindur që situata ka qenë shumë më dramatike sesa e prisnim. Sigurisht që vlen akoma ajo çfarë ne “kishim vizatuar”, objektivat qeverisëse që ne kemi, por nuk mund të hidhesh tek hapi i pestë pa kaluar nëpërmjet katër të parëve.
Jetojmë në kohë ku po flitet për informalitetin me tone të ashpra, por prapë nuk kemi rritje të ardhurash…
Siç e thashë, nuk mund të kemi rritje të ardhurash për një periudhë afatshkurtër, këto aksione dhe reforma nuk i shfaqin frytet menjëherë, janë aksione që sjellin benefite të shtuara në cilësinë e jetës së qytetarëve, por jo menjëherë. Unë do ta quaja reformë atë të informalitetit, jo aksion, sepse po të shohësh sot ka më shumë se dy mijë biznese të rregjistruara në QKR. Ka shumë me tepër biznese që kanë rregulluar raportin me kuponin tatimor. Të ardhurat që do të mblidhen nuk do të jenë për një muaj apo për dy, por do të sjellin mundësi më shumë për t’iu ofruar shërbime qytetarëve, ndaj mos prisni t’i shikoni qysh në ditët e para të saj.
Ju e njihni më mirë se unë realitetin e Korçës, jeni deputete aty. Dihet që në Korçë domatja bëhet vonë, jemi në kohën e mollës, fermerët duan t’u mbrohet prodhimi. Kjo si bëhet?
Kjo është një situatë për hir të së vërtetës shumë fatkeqe, unë i kam parë nga afër, i kam ndjekur dhe si deputete. Është e dhimbshme të shohësh sesi iu shkon mundi dëm. Padiskutim një arsye është pamundësia e shtetit për t’i ndihmuar aq sa duhet, padiskutim janë subvencionet jo në masën që duhet të ishin. Por ne kemi një marrëveshje të tregtisë së lirë me vendet e rajonit. Nuk mjafton të ulësh traun dhe të shesësh domatet. Ata nuk gjejnë treg shpesh, ndaj hedhin mallin. Një nga gjërat që mendoj se mund t’i ndihmojë është dhe projektiligji që bujqërit apo fermerët, të cilët duhet të pajisen me numër NIPT-i, që tregtarëve t’ua shesin pa paguar TVSH, por që pastaj këtë mall të paktën ta dokumentojnë. Një mundësi tjetër shumë e mirë do të jenë edhe magazinat e depozitimit, që të paktën shteti të sigurojë që puna dhe djersa e këtyre njerëzve të mos shkojë dëm, por të grumbullohet dhe vlerësohet. Por, këto nuk janë gjëra që bëhen tak-fak.
Kjo puna e NIPT-it doli tani, por sot nëse futen makinat për të marrë mallin, hyjnë tatimorët nëpër fusha…
Po tregtarët patjetër që do t’i ndjekin tatimorët, sepse duam të fusim shtetin në shinat e ligjshmërisë. Duhet pak kohë që sisitemi të vendoset dhe formalizohet.
Unë kam lexuar një koment (që për mua ishte shterrues) i Erjon Braçës që thoshte se nuk mund të shkojë fshatari të lërë punën, të humbë ditën e të shkojë të merret me NIPT-in, por të ketë mundësi që të bëjë letrat aty ku jeton dhe pagesat t’i kryej në postë…
Patjetër që edhe kjo është një mundësi, e cila do të shikohet. Propozimi për të pajisur me NIPT fermerët është ende në fazë diskutimi, ende asgjë nuk është vendosur. Sigurisht që situata është siç ka pas qenë, por ne duam ta sistemojmë këtë treg.
Marrë me shkurtime nga: ‘Shih programin’ në TVSH
/tesheshi.com/
