“A i meritojnë bankierët bonuset e tyre? A mundet arkeologjia të vërtetojë apo të hedhë poshtë Biblën? Janë disa nga pyetjet që universiteti i Oksfordit u bën aplikantëve që dëshirojnë të studiojnë në institucionin prestigjioz arsimor.
Universiteti publikoi shembujt e përvitshëm të pyetjeve për aplikantët, në përpjekje për të demistifikuar procesin e pranimit në këtë shkollë, që është bërë shpesh temë debatesh dhe hipotezash nga më të pabesueshmet. Sipas të dhënave, të diplomuarit në këtë shkollë fitojnë rreth 400 mijë paundë më shumë gjatë jetës së tyre sesa homologët e universiteteve të tjera.
“Intervistat janë dizenjuar t’u japin kandidatëve një shans për të treguar aftësinë e tyre reale dhe potencialin që zotërojnë”, thotë Samina Khan, drejtoreshë e pranimeve në shkollë. Sipas saj, intervistat e pranimit janë kryesisht “biseda akademike” midis mbikqyrësve dhe kandidatit dhe i referohen kursit që ka zgjedhur studenti për të aplikuar. Khan thotë se studentët që dëshirojnë t’ia dalin mbanë e të tejkalojnë intervistën duhet të shohin përtej përsëritjes së asaj që ata dinë. Ajo thotë se pyetjet janë dizenjuar në mënyrë të tillë për t’i dhënë kandidatit një shans për të treguar potencialin real.
Pyetjet e këtij viti, që janë publikuar vetëm disa ditë përpara se studentët të aplikojnë për të nisur studimet vjeshtën e ardhshme, përfshijnë edhe një pyetje logjike për ata që dëshirojnë të studiojnë ekonomi dhe menaxhim. Pyetjet i adresohen studentëve që ata të japin mendimin e tyre nëse bankierët i meritojnë bonuset që marrin apo nëse qeveritë duhet të hyjnë në veprim për të vendosur kufij sesa shumë para ekstra marrin këta bankierë. Një nga intervistuesit, Brian Bell thotë: Një përgjigje e thjeshtë e pyetjes mund të jetë që meqënëse bankat janë përgjithësisht kompani private dhe punonjësit janë të lirë të punojnë aty ku dëshirojnë, atëherë paga është rrjedhojë e një tregu konkurrues të punës.
“Në këtë histori, bankierët fitojnë shumë pasi ata janë të aftë dhe kanë talent. Eshtë e vështirë të gjesh një arsye për ndërhyrjen e qeverisë në këtë rast, edhe pse duke u mbështetur në parimin e barazisë, dikush mund të dëshirojë një sistem taksash progresive që të rishpërndajë një pjesë të këtyre të ardhurave. Një kandidat i mirë do të vriste mendjen përse njerëz që duken se kanë talente të barabarta, do të paguheshin kaq shumë në sistemin e bankave sesa në punësime të tjera. A besojmë realisht se bankierët janë vërtet më të mirë sesa punonjësit e tjerë në termat e aftësisë në punë.
“Pika kyçe në përgjigje është të përpiqemi t’i bëjmë kandidatët të mendojnë për ekonominë në pagesa më shumë sesa të vjelim opinione nëse ata mendojnë se kjo është e drejtë ose jo.” Alison Salveson thotë se një pyetje që mund të bëhet për dikë që kërkon të studiojë Shkenca Orientale, është nëse mendojnë se arkeologjia mund të vërtetojë apo të hedhë poshtë Biblën.
“Për këtë pyetje, unë do të kërkoja një përgjigje që të tregonte se kandidati vlerëson faktin që Bibla është një koleksion dokumentesh të shkruara dhe të transmetuara përgjatë disa shekujve, dhe që përmban tradita të rëndësishme që kanë peshë në histori, por se studimi akademik i Biblës do të thotë që ajo të shqyrtohet me kujdes për të parë nga kanë ardhur këto tradita dhe për cilat qëllime janë shkruar”, thotë ajo. Ky vit nuk është hera e parë që Oksfordi publikon pyetje të tilla. Më parë, studentët iu janë përgjigjur pyetjeve për pasojat e zhdukjes së trigrave, u është kërkuar të përshkruajnë një kaktus, dhe të shpjegojnë përse shumë kafshë kanë vija. /tesheshi.com/
Përshtati: Juli Prifti
