Disa tornado të njëpasnjëshme kanë goditur Oklahomën, Kansasin dhe Nebraskën. Të shumta kanë qenë dëmet e regjistruara, mes së cilave shtëpi të shkatërruara dhe të paktën 12 persona të plagosur në Oklahoma, ku në disa zona të qytetit ka munguar edhe energjia elektrike. Parashikohet që në orët në vijim bilanci të jetë edhe më i keq.
Disa arinj dhe tigra kanë dalë për disa orë nëpër rrugë nga një kopsht zoologjik i zonës.
Stuhitë e forta kanë shkaktuar edhe përmbytje, por fatmirësisht nuk raportohet asnjë viktimë, ndërsa kafshët e egra janë kapur dhe rikthyer brenda kopshtit zoologjik.
Gjatë ditës, për shkak të motit të rënduar, udhëtarët, vizitorët dhe punonjësit e aeroportit të qytetit u spostuan për rreth 30 minuta në një tunel, për të shmangur tornadon që goditi zonën.
Oklahoma është shteti që është goditur dhe prekur më shumë nga tornadot dhe pritet që shumë shpejt të deklarojë gjendjen e emergjencës.
Një zëdhënës i shërbimit të urgjencës shëndetësore në këtë shtet ka thënë se 12 persona janë transportuar në spital, duke shpjeguar se për momentin nuk dihet se cila është gjendja e tyre shëndetësore.
Mjekët kanë ndërhyrë në shumë raste për të shpëtuar pacientët, persona në vështirësi për shkak të dëmeve të shkaktuara nga shirat e forta. Në disa pjesë të qytetit ka rënë deri në 15 centimetra shi.
“Edhe periferia e Oklahoma City është goditur nga tornadot, të cilat kanë shkatërruar dhjetëra banesa”,- ka thënë metereologu i shërbimit ndërkombëtar të motit, Michael Scotten. Tornadot kanë goditur edhe Kansasin e Nebraskën, ku momentalisht nuk ka të dhëna për të plagosur./tesheshi.com/
