Këshilli i Sigurimit të OKB-së mbështeti në mënyrë unanime përpjekjet e reja për paqe në Siri, ndërsa miratoi një rezolutë të re në këtë drejtim, e para në dy vjetët e fundit. Rezoluta i jep mbështetje një qeverie tranzicioni dhe mbështetet në marrëveshjen e Gjenevës së vitit 2012 që kërkon pushim të menjëhershëm të luftimeve.
Projektrezoluta e hartuar nga Franca u negociua prej më shumë se një muaji, pasi i dërguari i posaçëm i OKB-së, Staffan de Mistura paraqiti qëndrimin e tij lidhur me bisedimet e paqes.
Bisedimet e paqes, që pritet të fillojnë në shtator, do të krijojnë 4 grupe pune për të adresuar çështjet e sigurisë, mbrojtjes, kundërterorizmit dhe çështjet politike.
Procesi i paqes përfshin “themelimin e një qeverie tranzitore e cila do të ketë kompetenca ekzekutive. Kjo qeveri duhet të ndërtojë një konsensus dhe do të sigurojë vazhdimësinë e punës së institucioneve qeverisëse”.
Në deklaratën e miratuar nuk është përmendur qartësisht e ardhmja e presidentit Bashar Al-Assad por qeveritë perëndimore e kanë bërë të qartë se ky tranzicion do të thotë largim i Assadit nga pushteti. /tesheshi.com/
