Mianmari duhet të ndalojë menjëherë operacionet ushtarake ndaj myslimanëve Rohinga, të cilët për t´iu larguar dhunës, prej javës së fundit të muajit gusht, janë shpërngulur drejt Bangladeshit.
Deklarata është bërë nga Sekretari i Përgjithshëm i Kombeve të Bashkuara, António Guterres, sipas të cilit numri i të zhvendosurve ka arritur në mbi 500 mijë persona, raporton “the Guardian”.
Guterres paralajmëroi se kriza humanitare mund të shërbej si një terren për radikalizimin, kriminelë dhe trafikantët.
Ai tha se kjo krizë e gjerë “ka gjeneruar komplikime të shumëfishta për shtetet fqinje dhe rajonin më të madh, duke përfshirë rrezikun e konflikteve ndër-kulturore”.
Autoritetet qeveritare të Mianmarit duhet të lejojnë “akses të papenguar” për ndihmën humanitare dhe të sigurojnë “kthimin e sigurt, vullnetar, dinjitoz dhe të qëndrueshëm” të të gjithë atyre që kërkuan strehim në vende më të sigurta.
Rohinga është përballur me dekada të diskriminimit dhe persekutimit nga shumica e popullatës budiste në Mianmar, ku u mohohet shtetësia, pavarësisht nga rrënjët shekullore në vend. /tesheshi.com/
