Këshilli i Sigurimit i Kombeve të Bashkuara do të mbajë një takim urgjent për situatën e tmerrshme humanitare në qytetin sirian të Halepit, të cilën një zyrtar i OKB-së e përshkroi si një “tatëpjetë për në ferr.”
Ministri i Jashtëm francez, Jean-Marc Ayrault bëri thirrje për mbledhje të martën. Ai përshkroi për Reuters luftën brutale civile në Siri, si një nga “masakrat më të mëdha ndaj popullatës civile që pas Luftës e Dytë Botërore.”
“Në këtë takim, duhet të gjejmë një mënyrë për t’u marrë me situatën humanitare dhe të shohim se si mund të dërgojmë ndihmat atje. Ne duhet të gjejmë një mënyrë,” tha Ayrault.
Forcat e regjimit hynë në Halepin lindor përmes tokës të shtunën në një operacion, me qëllim marrjen nën kontroll të zonës nga kryengritësit të cilët kanë sunduar atje për më shumë se katër vite.
Me mijëra civilë po ikin për në vende më të sigurta– shumë prej tyre në drejtim të Halepit perëndimor, të kontrolluar nga qeveria – pasi regjimi vazhdon të godasë pjesën lindore të qytetit me sulme ajrore, ndërkohë që forcat kryengritëse po e përballojnë zjarrin nga fortesat e tyre nëpër enklava.
Rreth 20,000 njerëz kanë ikur nga lagjet lindore në ditët e fundit, tha shefi për çështje humanitare i OKB-së Stephen O’Brien për CNN të martën në mbrëmje, ndërkohë që rreth 200,000 banorë kanë mbetur në qytet.
Zona është shndërruar në një shkretëtirë, pasi që rrethimi i qytetit nga ana e qeverisë e ka lënë atë pa furnizim me ushqim, ujë të pastër, karburant dhe ilaçe. OKB-ja është duke kërkuar për një pauzë humanitare për të dërguar ndihmën e nevojshme atje.
Rreth 600 persona janë vrarë në Halepin lindor që nga e shtuna, kanë thënë burime të ndryshme aktivistësh për CNN, përfshirë 45 civilë të mërkurën, sipas grupit aktivist Aleppo Media Center. Në Halepin perëndimor të kontrolluar nga qeveria, tetë të tjerë u vranë të mërkurën, njoftoi agjencia shtetërore e lajmeve e Sirisë SANA.
Thirrjet ndërkombëtare për një zgjidhje politike për t’i dhënë fund luftës janë në rritje përherë e më shumë – diçka që Këshilli i Sigurimit të OKB-së ka shmangur për vite me rradhë, me Rusinë e cila si një nga pesë anëtarët e përhershëm, i ka bllokuar disa rezoluta duke përdorur veton e saj.
Rusia është aleati më i fuqishëm i regjimit të presidentit sirian, Bashar al-Assad dhe që nga shtatori 2015 ka kryer sulme ajrore në mbështetje të liderit sirian. Moska fajësohet gjerësisht për shkatërrimet në Halep, por është përpjekur të distancohet nga sulmet aktuale, duke thënë së fundi se nuk ka bombarduar Halepin që nga 18 tetori.
Kryeministrja britanike, Theresa May e përshkroi situatën në Halep si “të tmerrshme” dhe i bëri thirrje Rusisë për të vepruar.
“Ne duam të shohim një ndërprerje të armiqësive. Ne duam të shohim mundësi që ndihmat humanitare të futen në Halep dhe ne do të bëjmë presion për këtë në Këshillin e Sigurimit të OKB-së”, ka thënë May në parlament.
Këshilltari humanitar i OKB-së, Jan Egeland tha për CNN të martën se OKB ishte takuar me diplomatët rusë dhe ushtrinë për të gjetur një mënyrë për të futur ndihmat brenda.
“Unë besoj se ne do të marrim pushimin që kemi kërkuar,” tha ai, duke shtuar se janë “ende duke pritur” për një përgjigje. /tesheshi.com/
