Kombet e Bashkuara e kanë ndërprerë lëvizjen e të gjitha autokolonave me ndihma drejt Sirisë pasi një e tillë u bombardua pak orës pas përfundimit të armëpushimit.
I ashpër ka qenë reagimi i sekretarit të përgjithshëm të OKB-së, ndërsa një tjetër zyrtar i lartë i së njëjtit organizëm, Jens Laerke, tha se sulmi është i barabartë me një krim lufte.
Bombardimi nga ajri mbi autokolonën do të shkatërronte 18 prej 31 kamionëve, duke lënë të vdekur 20 civilë.
Sulme të tjera ajrore janë regjistruar sot mbi pjesën veriore të Halepit.
Por sipas Moskës, Rusia dhe Siria nuk kanë bombarduar asnjë autokolonë me ndihma.
“Forcat ajrore të Rusisë dhe Sirisë nuk kanë kryer sulme ajrore kundër autokolonës me ndihma të OKB-së në rrethinat jugperëndimore të Halepit,” ka deklaruar zëdhënësi i Ministrisë ruse të Mbrojtjes, Igor Konashenkov.
Ai madje tha se goditja nuk dukej të kishte qenë nga sulmet ajrore.
Peter Maurer, drejtuesi i Komitetit Ndërkombëtar të Kryqit të Kuq, deklaroi se sulmi mund të ketë pasoja serioze në veprimtarinë humanitare në Siri. /tesheshi.com/
