Me situatën që sa vjen e përkeqësohet në Halepin e rrethuar, OKB-ja ka kërkuar që të marrë nën kontroll korridoret humanitare, për t’u dhënë mundësi civilëve të largohen që andej.
I dërguari i OKB-së për Sirinë, Staffan de Mistura, i kërkoi Rusisë që t’ia lërë organizmit botëror kontrollin e korridoreve humanitare.
“Ora po troket për popullsinë e Halepit,” ka thënë i dërguari i OKB-së, duke iu referuar situatës së vështirë posaçërisht në lindje të Halepit, ku furnizimet mendohet të mbarojnë pas tre javësh.
“E si mund të prisni që njerëzit me mijëra të shkojnë përmes një korridori ndërsa ka bombardime e luftime?” pyeti ai.
Forcat që luftojnë në anën e regjimit sirian e kanë rrethuar pjesën lindore të Halepit që më 17 korrik, duke lënë brenda këtij rrethimi rreth 250.000 persona.
Rusia do të deklaronte të enjten hapjen e korridoreve humanitare për kalimin e civilëve dhe të luftëtarëve rebelë të dorëzuar, por lëvizja është parë me dyshim.
Franca e quajti hapjen e korridoreve jashtë qytetit si një përgjigje jo të besueshme ndaj situatës.
Kurse sekretari amerikan i Shtetit, John Kerry, deklaroi se nëse operacioni humanitar i Rusisë është një dredhi, mund t’i japë fund bashkëpunimit midis vendit të tij dhe Moskës. /tesheshi.com/
