Edhe pse armëpushimi në Siri po respektohet përgjithësisht, çështja e bllokimit të ndihmave që presin të dërgohen në territoret siriane është kthyer në një problem më vete.
OKB-ja i ka bërë thirrje sot qeverisë siriane që të lejojë menjëherë dërgimin e ndihmave në pjesën lindore të Halepit, ku rreth 300.000 njerëz gjenden në rrethim.
Staffan de Mistura, i dërguari i posaçëm i OKB-së për Sirinë, deklaroi se kamionë me ndihma po presin në kufirin turk për të kaluar në Siri.
“Qeveria siriane premtoi para armëpushimit leje për autokolonat me ndihma të OKB-së; ato nuk janë marrë ende. Kjo është diçka që kërkohet të ndodhë menjëherë,” tha De Mistura në Gjenevë.
Njëzet kamionë me ndihma janë në pritje në anën turke të kufirit që ditën e djeshme për të udhëtuar drejt Halepit. /tesheshi.com/
