Greqia është ndalesa e parë për mijëra refugjatë të luftës që synojnë të hyjnë në BE. Ishujt grekë të Egjeut janë pika e parë e ndalimit për refugjatët dhe sipas zyrtarëve të OKB-së, gjendja në këta ishuj për pritjen e refugjatëve është “e turpshme”.
Një zyrtar i OKB-së, Vincent Cochetel që vizitoi ishujt Kos, Lesbos dhe Chios tha se emigrantët detyroheshin të flinin në vende publike. Ai apeloi Greqinë të menaxhonte situatën duke ngritur kampe refugjatësh që do të plotësonin nevojat bazë të emigrantëve.
Më shumë se 100 mijë refugjatë kanë mbërritur në Greqi që nga nisja e vitit 2015 e 60 për qind e këtyre personave janë nga Siria.
OKB e këshilloi Greqinë të përgjigjet në të njëjtën mënyrë që do të përgjigjej në rast të një katastrofe natyrore. Sipas OKB-së, dihet gjendja financiare e Greqisë për shkak të krizës, por Greqia është një vend i zhvilluar dhe duhet të jetë në gjendje të përmbushë nevojat bazë të emigrantëve.
“Ka shumë ndërtesa të zbrazura në këtë vend, kaq shumë toka të pakultivuara. Mos më thoni se është e pamundur të gjenden vende për këta njerëz”, shtoi zyrtari i OKB-së, cili tha se në Turqi që strehon një numër shumë të madh refugjatësh, kushtet në kampe janë të jashtëzakonshme. /tesheshi.com/
