Lideri i VMRO-DPMNE-së, Nikolla Gruevksi i ka me merak të madh, jo pensionistët por votat e tyre. Dhe duke e ditur nëpërmjet llogarive që ata nuk janë të pakët, njeriu që mëton ta mbajë ende pushtetin, i ndihmuar dhe nga aleati shqiptar Ali Ahmeti, e ka lëshua gjuhën e ofertave elektorale ndaj asaj kategorie që ndryshe konsiderohen si “me një këmbë në varr”
Rritje të pensioneve për të paktën 10,25 për qind në katër vitet e ardhshme, vazhdim të projekteve për rekreacion klimatik falas në banjë, uikend falas dhe tren falas – këto i premtoi ai gjatë takimit të sotëm me pensionistët e Prilepit.
Gruevski tha se prioritet i VMRO-DPMNE-së menjëherë pas ardhjes në pushtet janë pensionistët dhe theksoi se pensioni mesatar në vitin 2006 ishte 4.330 denarë(70 euro), ndërsa tani është 8.241 denarë(140 euro); gjegjësisht ka rritje për 90.32 për qind, ndërsa te rroga mesatare rritja është për 70,29 për qind, gjegjësisht prej 7.683 denarë(120 euro) është rritur në 12.085 denarë(200 euro).
Do të vazhdojë, siç tha, edhe shërbimi për transport falas me tren për të gjithë burrat mbi 64 vjet dhe për të gjitha gratë mbi moshën 62-vjeçare çdo të dytën fundjavë në muaj edhe në katër vitet e ardhshme.
M.Krasniqi – /tesheshi.com/
