Nga Ylli Pata
“Odiseja e vezëve” zbret në rrugë, pak poshtë zyrës së Edi Ramës, një javë pasi tentuan ta qëllojnë në Kuvend.
Një grup grash dhe vajzash nga Partia Demokratike, u mblodhën të martën para Kryeministrisë për t’u solidarizuar me deputeten Albina Deda, e cila u përjashtua për një javë nga punimet e Kuvendit pasi qëlloi me letër sheqeri (tip qeske për kafe e çaj) kryeministrin Edi Rama.
Vetë zonja Deda nga ana e saj, kërkoi që të përjashtohej Kryeministri, me pretendimin se ai përdori fjalë të rënda karshi saj. U tha që Rama i është drejtuar me epitetin “monstra”, ndërkohë që shefi i qeverisë, i cili pra qe shënjestër e një qeskeje sheqeri të lagur e të bërë topth e që e goditi mu në gjoks, thotë se e ka thirrur “motra” e jo “monstra”.
Për këtë arsye, që për palën tjetër politike është arsye e mosarsyes, gratë demokrate e cilësuan Edi Ramën një “dhunues të femrave”.
Albana Vokshi që foli në tubim, e cilësoi situatën si të tmerrshme dhe ku është prekur fundi. Zonja Vokshi tha se “vezët ndaj kryeministrit nuk ishin asgjë para fjalëve të tij ndaj koleges sonë”.
Një mungesë “ekselente” në tubim ishte mosprezenca e gruas së rëndësishme së PD-së, ish-kryeparlamentares Jozefina Topalli, asaj që në fakt i takonte të ishte në krye të piskamave të grarisë demokrate kundër Edi Ramës.
Por le t’i kthehemi zonjës Deda, asaj që tashmë po njihet jo nga ndonjë fjalim cilësor parlamentar, jo për ndonjë performancë politike tërheqëse, jo si adapte në ndonjë fushë të caktuar ku ja “thyhen hundët qeverisë” me aftësinë e saj; por si “mo(ns)tra e Ramës të cilit i gjuajti me topth sheqeri në emër të kauzës së dekriminalizimit.
Pas mitingut, i kërkuam asaj jë intervistë të shkurtër për tesheshi.com, mbi këtë duel epiko-politik të saj me kreun e qeverisë..
Zonja Dede, e tha me të vërtetë kryeministri atë fjalë për të cilët e akuzuat, se ai e ka mohuar…?
Po e ka thënë!
A do ta padisni në Prokurori për këtë?
Po çfarë ta padis, Prokuroria dhe Gjyqësori është nën këmbët e Ramës, ai i urdhëron me telefon.
Ka patur reagim nga ndërkombëtarët për atë çka ngjau të enjten e shkuar?
Jo as ka pasur reagim e as kam folur me njeri.
Çfarë do kërkoni në Kuvend, qoftë edhe nga koleget e krahut tjetër?
Shiko zotëri, ne kërkuam të dënohej Rama se sjellja e tij meritonte dënim, jo ne. Ky ishte reagimi ynë..
Si e shikoni në përgjithësi reagimin e shoqërisë shqiptare, organizatave të grave e të tjera ndaj këtij rasti?
Po ç’të them e shikoni vetë. Siç e ka thënë dhe Doktori (Berisha shën. red) jemi para një diktature. Njerëzit nuk dalin janë të frikësuar, jemi si në vitin 1997, por do të vijë dita dhe do të dalin siç dolën studentët në qytetin e tyre e më pas rrëzuan komunizmin…
/tesheshi.com/
