Nga Bashkim Kastrati
Në janar të vitit 2015, presidentja e Kosovës Atifete Jahjaga mori një iniciativë për të dalë në komuna të ndryshme të Kosovës dhe për t’i bindur qytetarët që të mos emigrojnë ilegalisht për në vendet e BE-së. Kjo, në kohën kur kishte një valë të madhe emigrimit dhe çdo ditë niseshin me dhjetëra autobusë kryesisht të grupmoshës së re, por edhe familjarë. Edhe pse ky aktivitet më shumë ishte përgjegjësi e kryeministrit dhe e kabinetit të tij qeveritar, presidentja Jahjaga mori iniciativën në fjalë për t’u takuar me qytetarët e revoltuar, ndërkohë që kryeministri Mustafa ishte fokusuar tek një detaj, ai vërejti se disa nga ata që po iknin nga Kosova kishin iphone me vete dhe kjo ishte arsyeja që ai tha se nuk doli në stacionin e autobusëve.
Tash kur ka kaluar një vit, Jahjaga ka marrë një iniciativë në fushën e ekonomisë. Ajo e shoqëruar nga drejtuesit e Odës Ekonomike të Kosovës, Odës Ekonomik Amerikane dhe Odës Ekonomike Gjermane, ka filluar që të vizitojë disa komuna të Kosovës, me qëllim të përkrahjes së zhvillimit ekonomik lokal dhe përkrahjes së investimeve të huaja në Kosovë.
Jahjaga ka deklaruar se ka vendosur të fillojë vizitat nëpër komuna të Kosovës për të nxitur një dialog të nevojshëm dhe të munguar për zhvillimin ekonomik, punësimin dhe investimet e huaja.
“Vizita ime së bashku me Odat ekonomike ka për qëllim adresimin e drejtpërdrejtë të këtyre pengesave për të ndihmuar bizneset që të depërtojnë në Kosovë, në përpjekje për të ulur papunësinë dhe për të ngritur kualitetin e jetës në Kosovë”, ka deklaruar Jahjaga, duke shtuar se gjatë gjithë mandatit të saj ka adresuar zhvillimin ekonomik në mënyra të ndryshme, prej komunikimeve të drejtpërdrejta me investitorë të huaj e deri te inicimi i partneriteteve strategjike.
Ndërsa përfaqësuesit e tri odave ekonomike kanë thënë se iniciativa e presidentes ka një rëndësi të madhe pasi që tregon që zhvillimi ekonomik është prioritet i institucionit më të lartë shtetëror dhe se është një aktivitet që e promovon një impakt të mirëfilltë publiko-privat, është një motivim për sektorin privat dhe është një dëshmi se në Kosovë prioritet i prioriteteve duhet të jetë zhvillimi ekonomik, dhe në qoftë se ky prioritet ka mbështetjen nga e para e Republikës së Kosovës, atëherë për përfaqësuesit e biznesit është një lehtësi, motivim dhe një dëshmi që Kosova ka ardhmëri dhe zhvillimi ekonomik duhet të jetë prioritet.
Ata kanë deklaruar se janë disa probleme të cilat janë identifikuar dhe po presin që t’i komunikojnë bashkërisht dhe se plani është që gjithashtu brenda një periudhe të shkurtër kohore të bëhen sërish vizita, por herën tjetër të bëhen nëpër kompani, që të shihet nëse ka pasur lëvizje nga ana e kryetarëve të komunave në drejtim të adresimit të këtyre çështjeve që i kemi identifikuar.
Vizita e Presidentes e mirëseardhur për bizneset
Edhe pse presidentja e Kosovës nuk ka kompetenca e as përgjegjësi për përkrahjen dhe zhvillimin ekonomik dhe të bizneseve, aq sa ka Qeveria me dikasteret e saj, vizita e saj shihet si pozitive nga ekonomistët.
Ekonomisti Lulzim Beqiri ka thënë për tesheshi.com se ky është nja hap i qëlluar dhe jashtëzakonisht mirë i menduar nga ana e presidentes që të del dhe të viziton komunat e Kosovës për çështje ekonomike, dhe që komunat shprehin problemet me të cilat ata ballafaqohen. Ai thotë se rrallëherë ndodh që politikanë të nivelit të lartë në Kosovë marrin kësi lloj vizitash pa qenë ndonjë fushatë zgjedhore ose interes tjetër i tyre personal.
“Ajo çka na gëzoi është se bashkërisht me tri odat ekonomike më të suksesshme dolën duke dëgjuar komunat për sfidat dhe perspektivat e biznesit në ato komuna, barrierat dhe problemet aktuale që ta po hasin gjatë operimit të tyre në tregun e Kosovës”, thotë Beqiri.
Ai thotë presidentja luan rol shumë të rëndësishëm sa i përket zhvillimit ekonomik, vizita të tilla presidentja ka pasur kohë pas kohe kur ka qenë nevoja dhe e mirëpret çdo qytetar një vizitë të tillë. Sipas tij, presidentja e vendit duhet të përpjekje edhe më shumë dhe të bëjë më shumë presion të Banka Qendrore për uljen e kamatave dhe reciprocitetin tregtar me Serbinë, sepse Serbia vazhdimisht po e dëmton Kosovën në fushën e ekonomisë.
“Vizitat e tilla janë motiv shtesë për komunat dhe bizneset, të paktën dikush po interesohet për hallet e tyre për herë të parë pa pagesë, zakonisht ne bizneset i shikojmë me syrin e kritikes, bizneset kosovare janë jetike për këtë shoqëri, andaj edhe investitorët presin që bizneset të vizitohen edhe nga presidentja edhe nga kryeministri edhe nga çdo udhëheqës kompetent”, theksoi Beqiri. /tesheshi.com/
