Mjetet e huaja të informimit raportojnë se sekretari i përgjithshëm i Organizatës për Çlirimin e Palestinës, Saeb Erekat, është shprehur i kënaqur me deklaratën përmbyllëse të konferencës për paqe në Lindjen e Mesme të mbajtur në Paris.
Ai ka deklaruar se OÇP-ja e ka mirëpritur deklaratën që thekson nevojën për t’i dhënë fund pushtimit izraelit.
Në të njëjtën kohë, OÇP-ja i ka bërë thirrje Francës, vendit organizator të konferencës, që ta njohë menjëherë shtetin e Palestinës me kufijtë e 1967-s, me Jerusalemin Lindor si kryeqytet të saj.
Siç u ka bërë thirrje të thuajse 70 vendeve që morën pjesë në konferencë që ta njohin Palestinën siç njohin Izraelin.
Deklarata përmbyllëse e konferencës së Parisit bën thirrje për një zgjidhje me dy shtete të konfliktit izraelito-palestinez, si dhe u kërkon palëve të shmangin hapat e njëanshëm e të shkojnë drejt paqes me negociata të drejtpërdrejta.
Në një konferencë shtyp, ministri i Jashtëm francez, Jean-Marc Ayrault, tha se diplomatët e vendeve pjesëmarrëse nënvizuan se baza për negociata duhet të jenë kufijtë e 1967-s, përpara se Izraeli të pushtonte Bregun Perëndimor dhe Jerusalemin Lindor. /tesheshi.com/
