Organizata Botërore e Shëndetit (OBSH) ka lavdëruar edhe një herë Kinën për reagimin e saj ndaj pandemisë së virusit koronar, duke treguar “hapjen” e vendit për mundësinë e kryerjes së hulumtimeve shkencore mbi origjinën e virusit, me pjesëmarrjen e ekspertëve nga jashtë.
Drejtori i Situatave të Emergjencave të OBSH-së, Mike Ryan tregoi për bisedime të përditshme me kolegë në Kinë, raporton AP.
Ai tha se agjensia e Kombeve të Bashkuara dhe shumë qeveri presin me padurim të kuptojnë origjinën shtazore të virusit, dhe theksoi se ai ishte shumë i kënaqur kur dëgjoi një “mesazh shumë të qëndrueshëm nga Kina” për hapjen ndaj një qasjeje të tillë.
Ryan tha se ai nuk besonte se kishte një datë të caktuar që një mision ndërkombëtar të dërgohej në Kinë për të hetuar origjinën e virusit, “por ne mezi presim që ta bëjmë këtë sa më shpejt të jetë e mundur”.
Trump akuzon OBSH dhe Kinën
Drejtori i Përgjithshëm i OBSH-së Tedros Adhanom Ghebreyesus kujtoi se ishte arritur një marrëveshje me Kinën në shkurt mbi ekspertët ndërkombëtarë për të vizituar vendin, por që kjo ende nuk kishte ndodhur.
Virusi u shfaq në fund të vitit 2019 në qytetin kinez Wuhan, i cili ka qenë në karantinë për dy muaj e gjysmë që nga 23 janari.
Administrata e presidentit amerikan Donald Trump akuzon autoritetet kineze që sipas tij informuan botën me vonesë për sëmundjen dhe se fshehin informacione për shtrirjen e epidemisë.
Trump akuzoi agjencinë e KB në prill se ishte shumë afër Kinës dhe keqmenaxhimit të krizës.
Ai kërcënoi të mos financojë OBSH dhe të tërheqë Shtetet e Bashkuara nga organizata. /tesheshi.com/
