Bordi këshillimor i Organizatës Botërore të Shëndetësisë (OBSH) është planifikuar të takohet të martën për të diskutuar vaksinën AstrraZeneca, e cila është pezulluar përkohësisht nga Gjermania, Franca, Italia, Spanja, Sllovenia dhe vende të tjera.
Vaksina u pezullua pasi disa vende raportuan probleme serioze shëndetësore dhe vdekje në disa pacientë që morën vaksinën.
Drejtori i Përgjithshëm i OBSH-së Tedros Adhanom Ghebreyesus tha se sistemet e destinuara për mbrojtjen e shëndetit publik po funksionojnë, sepse disa vende kanë pezulluar përdorimin e vaksinës kundër COVID-19 nga AstraZeneca për të hetuar efektet e mundshme anësore, raporton Reuters.
“Kjo nuk do të thotë domosdoshmërisht se këto fatalitete kanë të bëjnë me vaksinimin kundër COVID-19, por është praktikë e zakonshme t’i hetojmë ato, gjë që tregon se sistemi i mbikëqyrjes po funksionon dhe se ka kontrolle efektive,” tha ai gjatë një konferencë në internet.
Gjermania, Franca, Italia dhe Spanja kanë ndaluar përdorimin e vaksinës AstraZeneca kundër COVID-19 për shkak të raporteve të reja të mpiksjeve të rrezikshme të gjakut që lidhen me vaksinën.
Sllovenia gjithashtu u bashkua me një grup në rritje të vendeve në Bashkimin Evropian që kanë vendosur të pezullojnë përkohësisht vaksinimin me AstraZeneca, që të hënën në mbrëmje.
Ndërsa vetë AstraZeneca tha se nuk kishte asnjë arsye për shqetësim në lidhje me vaksinën e tyre.
Agjencia Evropiane e Barnave (EMA) tha se ndërsa po kryenin hetimet për efektet anësore të mundshme të vaksinës, ajo pohoi se përfitimet e vaksinës në parandalimin e COVID-19 tejkalojnë rrezikun e efekteve anësore.
Deklarata tha se EMA po vazhdon hetimin e saj në raportet e fataliteteve në lidhje me formimin e mpiksjes së gjakut në njerëzit që morën vaksinën. /tesheshi.com/
