Drejtori për Evropën e Organizatës Botërore të Shëndetit (OBSH) e përshkroi epideminë e virusit koronar në Evropë si “shumë shqetësuese” dhe u kërkoi qeverive të mendojnë me kujdes përpara se të lehtësonin masat për të parandaluar përhapjen e virusit.
“Nuk është momenti për të zbutur masat. Eshtë koha për të dyfishuar ose trefishuar përpjekjet tona kolektive për të eliminuar (virusin), me mbështetjen e të gjithë shoqërisë,” tha Hans Kluge, Drejtori Rajonal i OBSH-së për Evropën, në një konferencë virtuale.
Ai e përshkroi situatën në Evropë si “shumë shqetësuese”, duke shtuar se ende ka një “rrugë të gjatë në këtë maratonë”, në të cilën virusi duhet të mundet.
Bruce Aylward, një këshilltar i lartë i drejtorit të OBSH-së, i cili është rikthyer nga Spanja, një nga vendet më të goditura, tha se ishte shumë herët për të folur për optimizëm, por se epidemia ishte “përfundimisht duke u ngadalësuar”.
Gjithashtu, OBSH mohoi që organizata ishte e përqendruar fuqimisht në Kinë, duke shtuar se në këtë faë akute e pandemisë nuk ishte koha për të shkurtuar fondet. Reagimi erdhi pasi Presidenti Trump tha që OBSH kishte dhënë këshilla të këqija dhe kërcënoi të shkurtojë kontributet.
Shtetet e Bashkuara janë kontribuesi më i madh në arkën e OBSH.
Aylward mbrojti gjithashtu marrëdhëniet OBSH-Kinë, duke shpjeguar se bashkëpunimi me autoritetet në Pekin ishte i rëndësishëm për të kuptuar epideminë, e cila filloi në Wuhan të Kinës.
“Ishtë e rëndësishme që në periudhën e hershme të pandemisë të kishte akses në gjithçka që ishte e mundur, të vije e të punoje me kinezët për ta kuptuar këtë,” theksoi ai.
Trump të martën akuzoi OBSH-në se ishte shumë më afër Kinës dhe keqmenaxhimit të pandemisë dhe kërcënoi se Shtetet e Bashkuara nuk do të financojnë organizatën. /tesheshi.com/
