Situata dhe prirjet epidemiologjike në Evropën Jugore dhe në Ballkan janë shqetësuese, tha të mërkurën Michael Ryan, kreu i Departamentit të Situatave të Emergjencave të Organizatës Botërore të Shëndetit (OBSH).
“Nuk ka dyshim se fokusi i pandemisë është në Amerikën e Veriut dhe Jugut, por përhapja e virusit gjithashtu po nxehet në Afrikë,” i tha ai radios irlandeze Newstalk, raporton Reuters.
“Megjithëse vendet e Evropës Perëndimore kanë arritur ta sjellin epideminë nën kontroll, trendet shqetësuese janë shfaqur në Evropën Jugore dhe në Ballkan. Ne ende nuk kemi lënë zonën e rrezikut në Evropë,” tha Ryan.
“Situata epidemiologjike kërkon vigjilencë dhe kujdes të zgjatur,” paralajmëroi ai.
Duke folur për përpjekjet ndërkombëtare për të gjetur një vaksinë adekuate, Ryan tha “duhet të mësojmë të jetojmë me virusin derisa të gjejmë një zgjidhje, e cila mund të jetë vaksinimi”.
“Testimi i vaksinave është inkurajues, por ne duhet të presim për rezultatet e fazës së tretë të studimit dhe pastaj të prodhojmë sa duhet për t’u siguruar që të gjithë e marrin atë. Eshtë fantastike që kemi katër kandidatë që shkojnë në fazën e tretë të testeve”, tha Ryan. /teshesh.com/
