Drejtori Ekzekutiv i Organizatës Botërore të Shëndetit (OBSH) për Programet e Urgjencës, Mike Ryan tha se studiuesit po “bëjnë përparim të mirë” në zhvillimin e vaksinës COVID-19, disa prej të cilave janë në fazat e vona të testimit, por theksoi se përdorimi i tyre i parë nuk pritet më herët se viti i ardhshëm.
Ai tha se OBSH po punon shumë për të siguruar një shpërndarje të drejtë të vaksinës, por theksoi se ndërkohë është thelbësore të frenohet përhapja e koronavirusit.
“Ne po bëjmë përparim të mirë,” tha Ryan, duke vërejtur se disa vaksina janë në fazën e tretë të testimit.
Dhe asnjë deri më tani nuk ka dështuar në aspektin e sigurisë ose aftësisë për të gjeneruar një përgjigje imune.
Ai shtoi se OBSH po punon për të zgjeruar aksesin në vaksinat e mundshme dhe të ndihmojë në rritjen e kapacitetit prodhues.
“Ne duhet të veprojmë drejt, sepse është një e mirë globale. Vaksinat për këtë pandemi nuk janë për të pasurit, ato nuk janë për të varfërit – ato janë për të gjithë,” tha Ryan. /tesheshi.com/
