Testet për COVID duhet të përdoren kur udhëtojnë ndërkombëtarisht më shumë sesa karantinë, tha kryetari i Komitetit të Situatave Emergjente të Organizatës Botërore të Shëndetit (OBSH), Diddier Houssin.
Houssin, kryetar i një paneli të pavarur ekspertësh që këshillojnë OBSH për pandeminë COVID-19, tha se ishte e rëndësishme për agjencinë e Kombeve të Bashkuara që të sigurojë udhëzime të reja për udhëtimet ajrore të sigurta ndërkombëtare, njoftoi Reuters.
“Dhe padyshim që përdorimi i testeve tani duhet të ketë një vend shumë më të madh krahasuar me karantinën, e cila sigurisht do t’i bënte gjërat më të lehta duke marrë parasysh të gjitha përpjekjet e bëra nga linjat ajrore dhe aeroportet,” tha Houssin në një konferencë shtypi.
Drejtori i Menaxhimit të Emergjencave të OBSH-së Mike Ryan tha se udhëtimi tani është relativisht i sigurt dhe paraqet një rrezik relativisht të ulët shëndetësor, por që nuk ka rrezik zero.
Kompromisi i domosdoshëm
Ryan shpjegoi se për shkak të kësaj, vendet duhet të bëjnë një kompromis, sepse nga njëra anë ekziston rreziku që pasagjeri të jetë rrezik potencial infeksioni e të fillojë një zinxhir tjetër transmetimi, dhe nga ana tjetër është përfitimi i dukshëm i udhëtimit nga pikëpamja sociale dhe ekonomike.
Ryan tha se një ekip ndërkombëtar i shkencëtarëve i udhëhequr nga OBSH mbajti takimin e tyre të parë virtual me homologët kinezë në lidhje me hetimet e përbashkëta për origjinën e virusit që u shfaq në Kinë dhjetorin e kaluar.
“Ne plotësisht presim që ekipi të vendoset në terren,” tha ai, pa dhënë një kornizë kohore.
Ryan paralajmëroi se është e vështirë të bësh punë shkencore mbi origjinën e virusit në një mjedis “të helmuar politikisht”.
“Ne jemi shkencëtarë. Ne duam rezultatin më të mirë të mundshëm shkencor që gjeneron provat më të mira të mundshme të origjinës së kësaj sëmundjeje,” tha Ryan. /tesheshi.com/
