Organizata Botërore e Shëndetit njoftoi sot se 172 vende po marrin pjesë në iniciativën globale “COVAX”, e cila synon të sigurojë qasje të barabartë në vaksinat e ardhshme kundër koronavirusit, dhe theksoi se nevojiten më shumë fonde për zhvillimin e vaksinave.
Drejtori i Përgjithshëm i OBSH-së, Tedros Adhanom Ghebreyesus tha se nisma ishte thelbësore për t’i dhënë fund pandemisë COVID-19, si dhe të sigurojnë që çmimet e vaksinave të jenë më të ultat të mundshme.
Nisma drejtohet bashkërisht nga OBSH, aleanca e vaksinave GAVI dhe një koalicion inovativ për të arritur gatishmërinë për t’iu përgjigjur epidemive.
Nëntë vaksina të mundshme
Nisma deri më tani ka mbuluar nëntë vaksina të mundshme kundër COVID-19, dhe qëllimi i saj është të sigurojë vendet nënshkruese me një total prej dy miliardë doza vaksinash deri në fund të vitit 2021.
Vendet që dëshirojnë të bashkohen me iniciativën duhet të shprehin zyrtarisht interesin e tyre deri më 31 gusht, dhe të konfirmojnë qëllimin e tyre për t’u bashkuar deri më 18 shtator, ndërsa pagesa e parë e fondeve të destinuara për zhvillimin e vaksinave duhet të bëhen deri më 9 tetor, sipas Reuters.
Sipas Worldometers, COVID-19 ka infektuar më shumë se 23 milion njerëz në të gjithë botën, nga të cilët më shumë se 16 milion janë shëruar. Më shumë se 813 mijë janë shuar. /tesheshi.com/
