Juventus po mendon që tani për pasardhësin e Xhixhi Bufon, i cili me shumë gjasa do ta lerë sportin në fund të këtij sezoni. Drejtuesit e Zonjës së Vjetër nuk janë të bindur se portieri polak Shezni, të cilin e blenë në merkaton e verës, mund të fitojë statusin “i denjë”, për të mbrojtur portën e bardhezinjve. Sipas mediave spanjolle, Juve po shikon me shumë interes portierin slloven të Atletikos së Madridit, Jan Oblak.
Informacionet paraprake bëjnë të ditur se italianët po marrin të dhëna për situatën kontraktuale që portieri ka me klubin spanjoll. Oblak është vlerësuar maksimalisht nga ekspertët e klubit nga Torino, e mund të jetë i duhuri, pasi jo vetëm është në moshë shumë të re, por ka edhe eksperiencë në Champions League, trofeun e së cilës italianët vijojnë ta ëndërrojnë.
Por nga ana tjetër, nga klubi i Atletikos mbërrin një informacion që “ua pret pak krahët” juventinëve: Oblak ka pak kohë që ka rinovuar me madrilenët dhe klauzola e tij, është 100 milion euro.
A do të hyjë në “valle” Juventus për të bërë pazar me Atletikon, apo do të llogaritet ndonjë shitje e bujshme, për të marrë Oblakun portier, kjo është për tu parë.
Por e sigurtë është se Oblak nuk është objekt dëshirash vetëm i italianëve, pasi ka “fansa” brenda Madridit, si edhe shumë vëzhgues që e “ruajnë” prej kohësh në Angli. /tesheshi.com/
