Presidenti amerikan Barack Obama ka drekuar në Hanoi të Vietnamit me shefin e njohur të kuzhinës dhe yllin televiziv, Anthony Bourdain për emisionin “Parts Unknown” që të transmetohet në kanalin e njohur CNN.
Bourdain është takuar me Obaman, i cili ndodhet në vizitë zyrtare në Vietnam, dhe kanë biseduar për qëllimin e turit të tij në Azi dhe interesimin e tij për popullin, ushqimin dhe kulturën e Vietnamit, thuhet në njoftimin e emisionit televiziv amerikan, ka transmetuar AP.
Bourdain ka shkruar në Twitter se dreka e përbashkët ka kushtuar 6 dollarë, kurse faturën e ka paguar ky vetë.
Para restoranit në Hanoi ku kanë drekuar Obama dhe Boudain, u mbledhën një grup i madh njerëzish të cilët e përshëndetën përzemërsisht kreun e Shtëpisë së Bardhë pas daljes nga restorani.
Emisioni i Bourdain transmetohet në CNN prej vitit 2013, ku shefi i njohur i kuzhinës udhëton nëpër vende të ndryshme për të njohur kulturën, e në veçanti kuzhinën lokale.
Emisioni me Obamën do të transmetohet në kuadër të sezonit së tetë, që nis në shtator. /tesheshi.com/
