Presidenti amerikan, Barack Obama u zotua përpara samitit të OKB-së, se do të angazhohet në luftën kundër varfërisë, edhe kur të largohet nga Shtëpia e Bardhë.
“Përsa kohë jam presidenti dhe kur ta kem mbaruar detyrën, so të vijoj të luftoj për arsimimin dhe strehimin, kujdesin shëndetësor dhe punësimin, reduktimin e pabarazisë dhe krijimin e mundësive si këtu në Shtetet e Bashkuara ashtu edhe në të gjithë botën, pasi kjo nuk është punë e politikanëve. Eshtë detyrë e të gjithëve”, tha Obama.
Komentet e tij vijnë në samitin e OKB-së për Zhvillimin e Qendrueshëm ku u shpall më herët edhe axhenda e re e organizatës deri në vitin 2030. Obama apeloi liderët botërore të përshkallëzojnë luftën e tyre ndaj varfërisë në botë.
Axhenda e OKB-së është një kornizë përmes së cilës vendet angazhohen të eleminojnë varfërinë dhe të zbatojnë politika që do të kenë ndikim afatgjatë. Me afërsisht 1 miliardë njerëz që jetojnë me më pak se 1.25 dollarë në ditë, Obama tha se është një problem moral që miliarda janë në rrezik të vdesin nga sëmundje që mund të parandalohen ndërsa shumë fëmijë janë në prag të vdekjes, vetëm një e pickuar mushkonje.
Edhe pse ai përshkroi një panoramë të errët, Obama tha se është arritur shumë në luftën globale kundër varfërisë.
Pavarësisht këtyre arritjeve, sipas tij, ka shumë punë për ë bërë, pasi duke iu referuar statistikave, 11 fëmijë vdesin për minutë nga shkaqe që mund të shmangen, më shumë se 100 gra vdesin ndërsa lindin fëmijë, e përditë me dhjetëra milionë fëmijë nuk janë më në shkolla.
Pesë vjet më parë, Obama u zotua në samitin e OKB-së se SHBA do të mbetet lideri global në zhvillim dhe SHBA mbeten të parat në donacionet humanitare. /tesheshi.com/
