Thuajse pas nëntë dekadash, një president amerikan në detyrë ka vizituar Kubën, në një kulmim të përmirësimit të marrëdhënieve mes dy vendeve të konsideruara si armike mes tyre.
Presidenti Obama ka arritur në Havana mbrëmjen e së dielës, i shoqëruar nga bashkëshortja dhe dy vajzat, dhe dukshëm i lumturuar nga vizita.
Dy orë pas mbërritjes, ai do të fliste në ambasadën amerikane të rihapur, për të thënë fillimisht: “Eshtë e mrekullueshme të jesh këtu!”
“Në 1928-ën, presidenti Coolidge erdhi mbi një luftanije. Tre ditë iu deshën atij për të ardhur këtu, vetëm tre orë m’u deshën mua. ‘Air Force One’ është ulur për herë të parë në Kubë, dhe ky është pikërisht hapi ynë i parë,” ka thënë mes të tjerash presidenti amerikan.
“Kjo është një vizitë historike, dhe një mundësi historike…,” do të shtonte ai.
Obama ka zgjedhur më pas të vizitojë Havanën e vjetër, duke ecur në këmbë me çadrën në duar.
Ai do të takohet sot në mbrëmje me presidentin kuban Raul Castro, ndërsa të martën do t’i drejtohet popullit kuban me një fjalë e cila ka për t’u transmetuar drejtpërdrejt në televizion.
Vizita treditore e presidentit amerikan përfshin dhe një takim me disidentët kubanë. /tesheshi.com/
