Presidenti amerikan, Barack Obama, u ka uruar të gjithë muslimanëve kudo në botë fillimin e muajit të shenjtë të Ramazanit.
“Ky është rast i mirë për shumë njerëz për t’u përqendruar në reflektimin dhe në ngritjen shpirtërore, për falje, durim, ripërtëritje, për dhembshuri dhe unitet të të gjithë komunitetit.
Ne jemi të bekuar me komunitetin musliman, i cili është i shumëllojshëm, ashtu siç është edhe kombi ynë. Ka nga ata trashëgimia e të cilëve mund ndiqet që në fillimin e kombit tonë, dhe ka nga ata që sapo kanë ardhur në vendin tonë.”
Ai ka nënvizuar se Amerika është një “familje e madhe”, e se ai, bashkë me bashkësinë muslimane, qëndrojnë të vendosur në refuzimin e atyre zërave që po kërkojnë t’i ndajnë apo që po përpiqen t’i kufizojnë liritë fetare.
“Ne nuk mund të harrojmë miliona njerëz që janë zhvendosur nga luftërat dhe konfliktet nëpër botë e në oborrin pas shtëpisë sonë,” ka thënë Obama.
“Duhet të vazhdojmë të punojmë së bashku për t’ua lehtësuar vuajtjet këtyre individëve.”
Presidenti amerikan planifikon t’i ftojë muslimanët për festën e Bajramit, duke deklaruar: “Nuk mendoj se administrata ime ka ndonjë mënyrë më të mirë për ta shënuar fundin e Ramazanit, sesa duke e nderuar kontributin e muslimanëve në Amerikë dhe në të gjithë botën për festën e Bajramit.” /tesheshi.com/
