Presidenti amerikan do të udhëtojë për në Riad muajin e ardhshëm, më 21 prill, për të marrë pjesë në një takim të Këshillit të Bashkëpunimit të Gjirit.
Ulja e tensioneve rajonale dhe sektare, shtimi i presionit mbi ISIS-in dhe trajtimi i konflikteve rajonale do të jenë në qendër të bisedimeve.
Shtëpia e Bardhë e sheh takimin e Obama-s me udhëheqësit arabë si një mundësi për përtëritjen e marrëdhënieve të ftohura për shkak të marrëveshjes bërthamore me Iranin vitin e shkuar.
Një takim të ngjashëm pati vitin e shkuar në Kemp Dejvid, me thuajse të njëjtën temë.
Një krisje në marrëdhëniet mes Arabisë Saudite dhe Obama-s është shkaktuar së fundi nga komentet e presidentit amerikan në një revistë të vendit të tij. Këto komente nuk janë pritur mirë, duke sjellë reagime të ashpra të sauditëve ndaj tyre.
Obama do të vizitojë dhe Britaninë gjatë muajit të ardhshëm, për të vijuar më pas me vizitën në Gjermani. /tesheshi.com/
