Presidenti amerikan Barack Obama ka bërë thirrje sot për më tepër tolerancë, respekt dhe mirëkuptim nga ana e policëve ndaj njerëzve të cilët janë të ngarkuar t’i mbrojnë, por edhe nga individët, të cilët besojnë se policia është tepër brutale dhe jotolerante, veçanërisht ndaj popullatës me ngjyrë.
“Uroj që secila palë të dëgjojë tjetrën”, ka thënë Obama, duke iu përgjigjur pyetjeve të gazetarëve pas takimit me kryeministrin spanjoll, Mariano Rajoy, njofton AP.
Obama ka komentuar për katër ditë me radhë serinë e ngjarjeve që ndodhën në vend – të shtënat e policëve ndaj afro-amerikanëve në Lousiana dhe Minnesota, si dhe sulmin me snajper në të cilin u vranë shtatë policë në Dallas.
“Mbajtja e një toni respekti, të sinqertë dhe serioz do të ndihmojë mobilizimin e shoqërisë amerikane për të sjellur ndryshime të vërteta”, ka theksuar presidenti amerikan.
Ai po ashtu ka thirrur në balancim gjatë zbatimit të ligjit, duke shprehur shpresën e tij se policia do marrë parasysh frustrimin e njerëzve.
“Është në interesin e policisë që popullata të ketë besim në ta”, ka përfunduar Obama. /tesheshi.com/
