Presidenti amerikan Barack Obama paralajmëroi se gjithë personat përgjegjës për dhunën e së hënës në mbrëmje në qytetin e Baltimorës do të trajtohen si shkelës së ligjit.
Protestat shpërthyen në qytet pas funeralit të 25-vjeçarit Freddie Gray, një djalë afrikano-amerikan, i cili vdiq ndërsa mbahej i ndaluar nga policia në fillim të muajit.
Presidenti Obama tha se ajo që ndodhi të hënën në Baltimorë ishte një devijim i protestave të ditëve të fundit, që u përqendruan tek shqetësimet plotësisht të ligjshme lidhur me vdekjen e Freddie Grayt.
Presidenti i bëri këto komente pasi guvernatori i Marylandit, Larry Hogan u zotua se në Baltimorë nuk ka për t’u përsëritur ajo që ndodhi të hënën në mbrëmje.
“Është shumë e rëndësishme që të dalë në shesh e vërteta në lidhje me atë që i ka ndodhur Freddie Gray. Drejtësia duhet të mbledhë të gjitha provat për të qartësuar këtë çështje. Çdo individ ka të drejtën të mbrohet kur akuzohet për një faj apo shkelje ligji me një proces të drejtë. Njerëzit në Baltimora kanë të drejtë të dinë të vërtetën por kjo nuk është rruga e duhur për ta marrë vesh”, – tha kreu i Shtëpisë së Bardhë.
Një ditë pas dhunës që shpërtheu në Baltimore të shtetit Maryland, zyrtarët e qytetit po përpiqen të ulin tensionet. Dhuna filloi pas funeralit të një afrikano-amerikani 25-vjeçar, i cili pësoi një dëmtim të shtyllës kurrizore dhe vdiq, ndërsa ishte në arrest policor.
Më pas, qyteti u përfshi nga një valë plaçkitjesh dhe zjarresh. Autoritetet kanë dislokuar trupat e Gardës Kombëtare.
Në disa lagje të qytetit, ndërtesat vazhdonin sot të nxirrnin tym dhe vullnetarët filluan pastrimin e rrugëve nga mbeturinat. Një farmaci ishte mes objekteve të djegura dhe të plaçkitura. Dhjetëra policë me veshje speciale bënin roje ndërkohë që zjarrfikësit vazhdonin punën.
Kudo në qytet janë dislokuar trupat e Gardës Kombëtare, ndërsa autoritetet përpiqen të ulin tensionet, një ditë pas shpërthimit të protestave që pasuan funeralin e Freddie Gray-t, afrikano-amerikanit 25 vjeçar. Sipas njoftimeve, 15 policë u plagosën dhe gjashtë prej tyre ndodhen në spital. Dhjetëra vetë janë arrestuar./tesheshi.com/
