Barack Obama dhe Vladimir Putin u takuan në anekset e asamblesë së Përgjithshme të OKB-së, në Nju Jork, ku zhvilluan një bisedë të gjatë e të nderë për konfliktin në Siri, ndërsa marrëdhëniet mes dy shteteve dhe liderëve janë të turbullta. Ka nga ata analistë që i përshkruajnë marrëdhëniet mes Rusisë dhe Perëndimit në pikën e tyre më të ulët që nga mbarimi i Luftës së Ftohtë.
Por, takimi mes tyre është karakterizuar nga mendime të kundërta për disa probleme botërore, mes të cilave konflikti sirian është më i vështiri, për shkak të shumë ndërlikimeve të tjera, si dalja në skenë e ISIS, kundërshtia ndaj Assad, prania e shtuar ruse në Siri.
Korrespondentët thonë se “akulli” nuk shkriu pas takimit mes Obamës e Putin që u zhvillua gati një vit pas mbledhjes së G20 në Australi, nëntorin e shkuar. Më herët, ata ishin takuar për të diskutuar krizën ukrainase gjatë ceremonive për 70-vjetorin e dislokimit të aleatëve në Europë.
Gjuha e trupit është përkthyer qartazi si ftohtësi maksimale mes dy liderëve, secili duke u përpjekur të tregojë sjellje të mirë me tjetrin, por asgjë më shumë. Gjithë të tjerat tregojnë tension, në kontrast të plotë me takimet e mëparshme mes presidentëve rusë e amerikanë, që janë cilësuar historike, pasi kanë ndryshuar rrjedhën e ngjarjeve. Ky takim Obama-Putin nuk ka gjasa të ndryshojë ndonjë gjë.
Më herët, ata janë takuar në biseda shumëpalëshe dhe të dy presidentët ishin kufizuar me shkëmbimin e batutave.
Marrëdhëniet mes Uashingtonit dhe Moskës u ftohën në mënyrë dramatike pas aneksimit të Krimesë nga Rusia. Ky veprim solli edhe përjashtimin e rusëve nga G8.
Takimi në OKB u parapri nga një grindje e fortë mes administrative të dy presidentëve, Obama e Putin. Kush ftoi kë për takim.
Shtëpia e Bardhë deklaronte se kishte qenë Putin që kishte kërkuar disa herë të takonte Obamën, ndërsa Kremlini e përgënjeshtronte këtë tezë kategorikisht.
Grindje edhe për axhendën, njëri dëshiron të flasë për Sirinë, tjetri për Ukrainën. Shtëpia e Bardhë nuk e kishte fshehur shqetësimin për përshkallëzimin e pranisë ruse në Siri për të cilën rusët thonë se është vetëm në funksion të luftës kundër militantëve të ISIS. Amerikanët pretendojnë se Putin po përforcon pozitat e veta në Siri në rast se shteti bie nën barrën e luftës civile.
Ndërkaq, në fjalimin e mbajtur në asamblenë e Përgjithshme të OKB-së, Putin u duk fort i vendosur në qëndrimin e tij, duke propozuar një qasje të re për Sirinë: mbështetje ndaj al Assad për të luftuar ISIS.
Mediat amerikane thanë se Putin në fjalën e tij vuri në dyshim lidershipin amerikan, duke i marrë “fuqinë” që duhej të kishte presidenti Obama në adresimin e OKB-së. Sipas medias, Putin propozoi një “grusht shteti” ndaj Amerikës, për të marrë drejtimin e koalicionit që lufton në Siri.
Duke lënë mënjanë komentet që reflektojnë edhe sulmet e republikanëve për një politikë të jashtme të dobët të administratës Obama, duket qartë se takimi me Putin nuk ka arritur të përmirësojë as marrëdhëniet mes dy shteteve dhe as të krijojë premisa më të mira për zgjidhjen politike të konfliktit në Siri. /tesheshi.com/
