Presidenti amerikan ka pritur të premten në Shtëpinë e Bardhë zëvendësprincin saudit të kurorës, Muhammed bin Selman, me temë të bisedimeve mes të tjerash situatën në Siri, në Jemen e Irak.
Takimi u zhvillua në Zyrën Ovale, diçka që rrallë u rezervohet të ftuarve që nuk janë kryetarë shtetesh. Princi saudit shoqërohej nga ministri i Jashtëm, Adil el-Xhubejri, e në takim ishte dhe zëvendëspresidenti amerikan, Joe Biden.
Obama do të vinte në pah rolin kyç të udhëheqësit saudit në mbarëvajtjen e marrëdhënieve saudito-amerikane, që duken se po përmirësohen ndjeshëm pas një ftohjeje të përkohshme.
Pjesëmarrësit në takim do të theksonin rëndësinë e mbështetjes së ndërprerjes së luftimeve në Siri, si dhe të një tranzicioni politik që do t’i jepte fund sundimit të Beshar Esadit.
Princi saudit dhe presidenti amerikan do të diskutonin dhe për aktivitetet destabilizuese të Iranit në Lindjen e Mesme.
Pas bisedimeve në Shtëpinë e Bardhë, ministri i Jashtëm saudit do t’u thoshte gazetarëve se vendi i tij i kishte nxitur prej kohësh SHBA-të që të udhëhiqnin një përgjigjje ushtarake për ta minuar pushtetin e Esadit.
El-Xhubejri do ta bënte të qartë se Arabia Saudite kishte kërkuar që në fillim të krizës siriane një politikë më të fuqishme, duke përfshirë sulmet ajrore. Gjithashtu ai ripërsëriti dëshirën e sauditëve për ta pajisur opozitën e moderuar siriane me raketa tokë-ajër e për të patur forca saudite në çdo operacion të udhëhequr nga SHBA-të.
Jemeni po ashtu zuri vend gjatë një pjese të mirë të bisedës, dhe Obama e mirëpriti angazhimin e Arabisë Saudite për arritjen e një marrëveshjeje politike në konfliktin jemenas. /tesheshi.com/
