Konventa e demokratëve në Filadelfia është ngjarja politike e ditës në Shtetet e Bashkuara të Amerikës. Ndryshe nga dita e parë, e nisur me kundërshti dhe me përplasje përkrahësish, tjetër atmosferë ka sjellë prania e presidentit amerikan, Barack Obama, që në fjalën e tij e ka çmuar fort kandidaten demokrate në zgjedhjet presidenciale të nëntorit.
“Mund të them me besim këtu se nuk ka patur kurrë një burrë apo grua më të kualifikuar se Hillary Clinton për të shërbyer si president i Shteteve të Bashkuara të Amerikës.”
Kjo ishte fjalia më domethënëse e Barack Obama-s, në një mbështetje të pakursyer për Hillary Clinton-in.
Për Obama-n, Hillary Clinton është një person që dëgjon, që e ruan gjakftohtësinë dhe që e trajton çdokënd me respekt.
Ajo ka qenë pjesë e vendimeve më të mëdha me të cilat janë përballur SHBA-të, si një politikane dhe si një ish-sekretare e Shtetit, ka nënvizuar presidenti.
“Jam shumë më optimist se kurrë më parë për të ardhmen e Amerikës,” u ka thënë të pranishmëve Obama në sallën e tejmbushur.
Fjala e Obama-s do të mbyllej me ngjitjen në podium të kandidates demokrate, me një përqafim të ngrohtë mes presidentit amerikan dhe pretendueses për atë post.
Hillary Clinton do duhet ta pranojë sot formalisht kandidimin për postin e presidentit të Amerikës.
Zëvendëspresidenti amerikan, Joe Biden, do të fliste gjithashtu në konventë, duke e sulmuar keq kandidatin republikan, Donald Trump.
Për të, Trump është i papërshtatshëm për t’u zgjedhur president i SHBA-ve.
“Kërcënimet janë shumë të mëdha, kohët janë tepër të pasigurta, për ta zgjedhur Donald Trump-in si president të Shteteve të Bashkuara.”
Senatori Tim Kaine e pranoi në konventë kandidimin për zëvendëspresident.
“E pranoj përulësisht kandidimin nga partia ime për të qenë zëvendëspresident i Shteteve të Bashkuara,” shkruhej në faqen e tij në një rrjet social.
Me mbylljen e konventës së demokratëve nis dhe beteja e vërtetë mes Hillary Clinton-it dhe Donald Trump-it, që parashikohet të jetë e ashpër deri në ditën e zgjedhjeve presidenciale në SHBA. /tesheshi.com/
