Presidenti amerikan ka lënë Arabinë Saudite për të vënë mbrëmë këmbën në kryeqytetin britanik në një vizitë treditore.
Që prej afrimit të kësaj vizite ka patur një debat për kohën e saj, pasi mbështetësit e Brexit-it janë shprehur për një ndërhyrje të drejtpërdrejtë në një proces që u përket qytetarëve britanikë. Obama e ka bërë të qartë më herët se është pro qëndrimit të Britanisë në BE.
Në një artikull të shkruar nga presidenti i SHBA-ve e të botuar sot nga Daily Telegraph, thuhet mes të tjerash, “E kuptoj se ka patur spekulim të konsiderueshëm, dhe njëfarë polemike, mbi kohën e vizitës time. Dhe unë pohoj: dua t’i uroj personalisht ditëlindjen Madhërisë së Saj!”
Fillimisht, Obama ka sjellë në vëmendje faktin se, “Mbretëria e Bashkuar mbetet një mike dhe aleate e Shteteve të Bashkuara si asnjë tjetër.”
Në rreshtat e mëposhtëm të artikullit shkruhet nga presidenti amerikan se është një çështje që duhet ta vendosin votuesit britanikë nëse Mbretëria e Bashkuar mbetet apo jo pjesë e BE-së. Megjithatë, ai sjell në vëmendje, “…rezultati i vendimit tuaj është një çështje me interes të thellë për Shtetet e Bashkuara”.
“Ndërsa qytetarët e Mbretërisë së Bashkuar bëjnë inventarin e marrëdhënies së tyre me BE-në, ju duhet të jeni krenarë se BE-ja ka ndihmuar në përhapjen anembanë kontinentit dhe periferisë së tij të praktikave dhe vlerave britanike, demokracisë, rendit ligjor, tregjeve të hapura,” vijohet më tutje në shkrimin e botuar te Daily Telegraph.
Obama u ka mëshuar fort përfitimeve të Britanisë me qëndrimin në BE.
“Bashkimi Europian nuk e moderon ndikimin britanik, ai e zmadhon atë. Një Europë e fuqishme nuk është kërcënim për udhëheqjen globale të Britanisë, ajo i jep më tepër peshë udhëheqjes globale të Britanisë.”
“Kur vjen puna te krijimi i vendeve të punës, te tregtia, e te rritja ekonomike në sintoni me vlerat tona, Mbretëria e Bashkuar ka përfituar nga anëtarësia në BE, brenda një tregu të vetëm që siguron mundësi të jashtëzakonshme për popullin britanik.”
Teksa shkrimi i presidentit amerikan i afrohet fundit, ka një thirrje të qartë për një votë pro qëndrimit të Britanisë në BE: “Ky lloj bashkëpunimi, nga ndarja e informacionit dhe kundërterrorizmi te hartimi i marrëveshjeve për të krijuar vende pune dhe rritje ekonomike, do të jetë shumë efektiv nëse shtrihet anekënd Europës. Tani është koha që miqtë dhe aleatët të qëndrojnë së bashku.”
Kryebashkiaku i Londrës, Boris Johnson, një prej mbështetësve më të spikatur të daljes së Britanisë nga BE-ja, e akuzoi ditë më parë për hipokrizi presidentin amerikan. Sipas tij, historia e SHBA-ve tregon se amerikanët nuk do të ishin kurrë të gatshëm ta ndanin sovranitetin.
Artikulli i sotëm do t’i ndezë më tepër me gjasa polemikat në Britani mbi vizitën e Barack Obama-s. /tesheshi.com/
