“Bota është përherë e më e ndërlidhur si kurrë më parë dhe është duke u afruar çdo ditë e më tepër. Ndërtimi i mureve nuk do të ndryshojë këtë realitet”, ka thënë së fundi presidenti Obama, duke folur para studentëve në Rutgers University. Me këtë thënie, ai preferoi t’i jepte një goditje në distancë kandidatit Donald Trump, lidhur me deklarimet e tij të bujshme me nota ksenofobe, e posaçërisht asaj mbi ndalimin e muslimanëve për të hyrë në territorin e SHBA
“Si president, detyra ime e parë është gjithmonë siguria dhe prosperiteti në SHBA, dhe si qytetarë ne gjithmonë e vendosim htetin në rend të parë. Por nëse dy dekadat e fundit na kanë mësuar ndonjë leksion, ajo është se sfidat më të mëdha nuk zgjidhen përmes izolimit’’, ka thënë Obama duke marrë duartrokitje të fuqishme nga studentët.
“Momentin kur shtetet përtej oqeanit fillojnë të coptohen, ato bëhen një bazë e mirë për edukimin e terroristëve dhe ideologjive si nihilizmi dhe dëshpërimi, i cili shpejt mund të arrijë në bregun tonë. Kur shtetet në zhvillim nuk kanë sistem funksional shëndetësor, epidemitë si Zika apo Ebola mund të përhapen dhe të rrezikojnë amerikanët, gjithashtu. Dhe vendosja e mureve nuk do ta zgjidhë këtë problem’’ ka thënë Obama.
Më tej ai u ndal posaçërisht tek muslimanët dhe thirrja e kandidatit Trump për t’jua ndaluar hyrjen në SHBA:
“Pengimi i muslimanëve i propozuar me idenë se ata duhet trajtuar ndryshe kur bie fjala për hyrjen në shtetin tonë, kjo nuk i bie vetëm tradhti e vlerave tona, kjo nuk është vetëm tradhti e asaj se kush jemi ne; por kjo do të armiqësonte edhe komunitetet tjera këtu në vend, të cilët janë partnerët tonë më të rëndësishëm në luftën kundër ekstremizmit”, ka thënë presidenti amerikan në largim. /tesheshi.com/
