Presidenti i SHBA-ve i ka telefonuar presidentit afgan, Eshref Ghani, dhe drejtueses së organizatës Mjekët pa Kufij, Joanne Liu, për t’u kërkuar ndjesë dhe për t’u shprehur keqardhjen për sulmin ajror amerikan mbi një spital në Kunduz, në Afganistan.
Sulmi vdekjeprurës ndodhi të shtunën, e u mori jetën 22 personave, ndërsa la të plagosur 37 të tjerë.
Zëdhënësi i Shtëpisë së Bardhë, Josh Earnest, bëri të ditur se Obama i shprehu ngushëllimet ekipit të Mjekëve pa Kufij, duke siguruar se do të ketë një hetim të gjithmbarshëm të fakteve mbi ngjarjen fatkeqe.
Gjithashtu, po sipas Shtëpisë së Bardhë, presidenti amerikan u zotua se do të vazhdojë të punojë ngushtë me qeverinë afgane të Eshref Ghanit.
Më herët, ditën e djeshme, organizata Mjekët pa Kufij pati bërë thirrje për ngritjen e një komisioni të pavarur ndërkombëtar për të bërë hetime mbi sulmin, të parë prej saj si një krim lufte.
E njëjta organizatë kërkoi që hetimi të përfshijë fakte dhe dëshmi nga NATO-ja, SHBA-të dhe Afganistani, e po ashtu të mbledhë dhe dëshmitë e pacientëve dhe të punonjësve të Mjekëve pa Kufij që i mbijetuan sulmit të së shtunës.
Incidente të tilla, ku goditen gabimisht objekte civile e njerëz të pafajshëm, nuk janë një gjë e rrallë. Ato kanë ndodhur më parë si në Afganistan e në Irak. /tesheshi.com/
