Sekretari amerikan i Mbrojtjes, Ashton Carter tha gjatë një mbledhjeje të Komitetit të Shërbimeve të Armatosura në Dhomën e Përfaqësuesve, në Uashington se do të ketë një gjueti në terren ndaj ISIS.
“Në bashkëpunim të plotë me qeverinë e Irakut, ne do të dërgojmë një ekspeditë të specializuar forcash shënjestruese, për të ndihmuar forcat irakene dhe ato kurde, të njohur si ‘Peshmerga’, ndërkohë që gjatë këtij misioni do të mund të kryejnë bastisje, të çlirojnë pengje, të mbledhin të dhëna për agjencitë e kundërzbulimit, si dhe të kapin krerët e ISIS”, tha Carter.
ISIS ka zaptuar territore të mëdha në Irak dhe Siri gjatë verës së vitit 2014. Një koalicion i udhëhequr nga Shtetet e Bashkuara dhe me pjesëmarrjen e 65 vendeve të tjera ka zhvilluar një fushatë sulmesh ajrore kundër xhihadistëve në të dy shtetet, Irak e Siri.
/tesheshi.com/
