Zyrtarë të lartë të Shtëpisë së Bardhë kanë bërë të ditur se presidenti Obama nuk do ta përdorë termin “gjenocid” në deklaratën e tij të 24 prillit, që shënon njëqindvjetorin e incidenteve të 1915-s. Njoftimi u është bërë udhëheqësve armeno-amerikanë, të mbetur të pakënaqur me vendimin në fjalë. Nga burimet turke mësohet gjithashtu se zyrtarët amerikanë e kanë vënë në dijeni për vendimin dhe ministrin turk të Punëve të Jashtme, Mevlut Çavushoglu, gjatë vizitës së tij të djeshme në Departamentin e Shtetit.
Obama pritet t’i përshkruajë incidentet si “Meds Yaghern”, një term armen me kuptimin, “fatkeqësi e madhe”.
Zyrtari amerikan, emri i të cilit nuk bëhet i njohur, e pranoi se kishte ca që shpresonin të dëgjonin një gjuhë tjetër këtë vit. “Ne i kuptojmë këndvështrimin e tyre, ndërsa besojmë se qasja që kemi zgjedhur në vitet e fundit mbetet e drejta, si për njohjen e së shkuarës, dhe për aftësinë tonë për të punuar me partnerët rajonalë për të shpëtuar jetë në të tashmen”.
Vendimi erdhi pas një jave debati të brendshëm, e pas presionit të armeno-amerikanëve për përdorimin e termit “gjenocid” nga presidenti amerikan. Kundër përdorimit të termit kanë qenë një numër zyrtarësh në Departamentin e Shtetit, posaçërisht ata që merren drejpërdrejt me Turqinë dhe fqinjët e saj në Lindjen e Mesme, si dhe në Pentagon. /tesheshi.com/
