Presidenti sirian, Bashar al-Assad kërkon të rrisë mbështetjen ruse për shkak se ndjehet një lider i mposhtur që ka humbur kontrollin në vendin e tij. Komentet e presidentit amerikan, Barack Obama vijnë pas konfirmimit se avionë rusë kanë kryer furnizime në Siri e kjo ka vendosur në alarm shtetet perëndimore që paralajmërojnë se ky veprim do të përshkallëzojë konfliktin.
“Duket se Assad është aq i shqetësuar saqë të ftojë këshilltarët rusë të hyjnë në lojë”, tha Obama gjatë një takimi me anëtarë të forcave të Armatosura në Fort Meade.
“Ne do t’ua bëjmë të qartë rusëve se nuk mund të angazhohen dyfish në një strategji që do të dështojë”, shtoi Obama.
Sipas presidentit, rritja e pranisë ruse në Siri, nuk do të bëjë që Shtetet e Bashkuara të ndryshojnë kursin e operacioneve kundër Shtetit Islamik në Siri dhe në Irak.
Moska ka qenë prej kohësh një mbështetëse kryesore e Assad, duke e furnizuar presidentin sirian me armë dhe duke e financuar atë gjatë konfliktit, që ka hyrë në vitin e pestë.
Moska e sheh Assad-in si “bastin” më të mirë kundër grupeve ekstremiste në Siri, përshirë edhe Shtetin Islamik.
Në një paralajmërim të qartë për Moskën, Obama tha se mbështetja për Assad në Siri do të kishte pasoja për vetë Rusinë duke shtuar dhunën e militantëve brenda vetë territorit të saj.
“Rusët duhet të nisin të jenë pak më të zgjuar sesa kanë qenë, për shkak se ata kërcënohen në më shumë mënyra sesa ne, nga Shteti Islamik. Ata kanë popullsi të mëdha muslimane që historikisht kanë qenë problematike brenda Rusisë dhe strategjia që rusët po ndjekin tani, duke dyfishuar mbështetjen ndaj Assad, mendoj se është një gabim i madh”, theksoi Obama.
Si Obama ashtu edhe presidenti rus, Vladimir Putin pritet të marrin pjesë në takimin e asamblesë së Përgjithshme të OKB-së këtë muaj në Nju Jork, por nuk është e qartë nëse do të ketë takim mes tyre.
Më shumë se 250 mijë njerëz kanë humbur jetën në konfliktin sirian dhe me miliona sirianë janë zhvendosur nga shtëpitë e tyre. /tesheshi.com/
