Barack Obama dhe Rodrigo Duterte do të takoheshin sot pasdite në Laos gjatë zhvillimit të një samiti rajonal, por takimi nuk do të kryhet.
Presidenti amerikan e ka anuluar takimin e tij të parë me homologun e Filipineve disa orë pasi Duterte përdori një fjalor vulgar në lidhje me Obama-n.
Duke deklaruar se nuk do merrte leksione nga udhëheqësi amerikan mbi të drejtat e njeriut, Rodrigo Duterte lëshoi fjalë fyese në drejtim të shefit të Shtëpisë së Bardhë.
Obama ka kërkuar fillimisht nga personeli i tij të shohin nëse takimi i paraparë do të ishte i dobishëm, për ta anuluar fare atë orë më vonë. Në vend të kësaj, siç ka njoftuar një zëdhënës i Shtëpisë së Bardhë, Obama do të takohet me presidentin e Koresë së Jugut.
Në një deklaratë të lexuar nga zëdhënësi i presidentit të Filipineve, Duterte shprehte keqardhjen për çka kishte ngjarë, e për anulimin e takimit, duke nënvizuar se fjalët fyese nuk kishin qenë diçka personale.
“Ndërsa shkaku i atypëratyshëm ishin komentet e mia të forta ndaj disa pyetjeve të shtypit që sollën shqetësim, na vjen keq që ato u morën si një sulm personal mbi presidentin amerikan.”
Zëdhënësi i Duterte-s, Ernesto Abella, tha se për takimin kishte patur pajtim me amerikanët për ta shtyrë për një kohë të mëvonshme. /tesheshi.com/
