NYT: Uniteti i NATO-s, gjithnjë e më i vështirë për t’u mbajtur

Uniteti i NATO-s, të cilin presidenti amerikan Joe Biden e promovon në çdo hap, po bëhet gjithnjë e më i vështirë për t’u ruajtur me përparimin e luftës në Ukrainë, shkruan New York Times.

Si një “shembull të shkëlqyer” të kësaj, gazeta citon debatin e vazhdueshëm për të ardhmen e Ukrainës.

Aleanca funksionon sipas parimit të konsensusit, gjë që zemëron gjithnjë e më shumë anëtarët më të mëdhenj që ofrojnë një pjesë më të madhe të buxhetit.

Presidenti ukrainas Volodymyr Zelensky ka kaluar javën e kaluar duke shkuar nga një kryeqytet i NATO-s në tjetrin për të fituar mbështetje, madje duke kërcënuar se nuk do të paraqitet në samitin në Vilnius nëse nuk arrihet përparim i rëndësishëm kur bëhet fjalë për anëtarësimin e Ukrainës.

Megjithatë, në një intervistë për CNN, presidenti amerikan tha se ai nuk mendon se Ukraina është gati për anëtarësim në NATO dhe se anëtarësimi i saj në Aleancë, për aq kohë sa të zgjasë konflikti, do të çonte në një luftë midis Shteteve të Bashkuara të Amerikës dhe Rusisë. Gazeta amerikane shton se Biden ka 15 muaj që dërgon mesazhe të tilla.

Edhe Gjermania është dakord me të, por disa vende që dikur ishin pjesë e bllokut sovjetik besojnë se Ukraina duhet të pranohet sa më shpejt të jetë e mundur ose sa më shpejt që të arrihet një armëpushim.

Mosmarrëveshjet rreth anëtarësimit mund të shtyhen në plan të dytë nga fakti se kundërsulmi i shumëpritur e Ukrainës nuk po përparon siç pritej dhe se Kievit mund t’i mbarojë municioni.

Opinionet janë të ndara

“Çështja se çfarë saktësisht do t’i premtohet Ukrainës, do të jetë më e vështira në samit”, shkruan New York Times.

Pritet që në komunikatën përfundimtare të thuhet se Ukraina ka një vend në Aleancë, por ka ende një debat nëse do të shtohet “kur të lejojnë kushtet”.

Por, përveç frazave, mbetet e diskutueshme se si Ukraina të arrije atje dhe përmes cilit proces.

Megjithatë, në samitin në Vilnius do të ketë një akt simbolik; marrëdhëniet e NATO-s me Ukrainën do të përmirësohen në “statusin e këshillit”, që do të thotë se përfaqësuesit e Kievit, kur të diskutohen çështjet kryesore, do të ulen në takime si pjesëmarrës të barabartë me përfaqësuesit e vende të tjera anëtare.

Samiti do të miratojë gjithashtu një premtim të ri për shpenzimet e mbrojtjes për të zëvendësuar atë të rënë dakord në 2014, i cili planifikonte që aleatët të shpenzonin dy përqind të PBB-së për mbrojtjen.

Të dhënat tregojnë se vetëm 11 anëtarë nga 31 e bëjnë këtë dhe NATO nuk ka se si t’i detyrojë ata të zbatojnë këto kërkesa.

Gjithashtu, dhe ndoshta po aq e rëndësishme sa çdo gjë tjetër, aleatët do të japin miratimin politik për zhvillimin e planeve të para të detajuara të luftës, se si të mbrohet i gjithë territori i NATO-s, sipas gazetës amerikane. /tesheshi.com/